Shillong, Nailur 25: Mynta ka sngi u Chief Executive Member jong ka Khasi Hills Autonomous District Council u bah Pyniaid Sing Syiem u la wanrah ha ka jingiashong dorbar kaba kyrpang T.4.35 klur.
Haba jubab ia ka jingpan jingpynshai na ka liang pyrshah u CEM jong ka KHADC u la ong ba, ka jingpan shuh ia katei ka pisa ka long ban pyndon kam ha kane ka snem mang tyngka 2023-2024 ha ki tnad bapher bapher.
Haba ia dei bad ki kam ialehkai ka District Council kala ioh ia ka jingiarap na ka sorkar shiklur tyngka, ia kane ka pisa yn iasam bad ki para MDC ba kin pyntrei kam bad lyngba kane ka pisa yn shna ruh ia ka madan ialehkai ha New Shillong Township ka ban dei jong ka KHADC.
Na ka bynta ka Art bad Culture la mang pisa T.20 lak tyngka kane ka long ban ai ka jingkyrshan kum ka Shad Weiking, Nongkrem bad kiwei ki jingshad ha ki Hima kiba pynneh pynsah ia ka riti dustruct, ia kane ki MDC ki lah ban phah ia ka jingturwa sha ka EC.
Na ka bynta ban siew ia ka bai bam jong ki MDC la mang T.20 lak tyngka namar kumba ka long mynta ki don 30 ngut ei ei ki MDC kiba dei ban ioh ia ka baibam tynmen jong ki bad kane ka pisa kan long tang haduh ban Lber 2024, la dep ban siew iaki MDC ka bai bam T.24 lak tyngka.
Ka pisa T.3.5 klur kane ka long ban siew ia ka arear jong ki nongtrei ka ophis, ka pension jong ki nongtrei na ka liang jong ka EC ka kwah ban siew ia kaei kaba dei ban siew sha ki nongtrei ka KHADC.
La iathuh ruh hapoh ka iing iing dorbar ba ka KHADC kand ang ioh na ka sorkar ia ka bhah na ki marpoh khyndew kiba rit ka long T.7 Klur tyngka bad na ki kali bad ki marpoh khyndew kiba heh ka KHADC kan dang ioh ia ka bhah na ka sorkar T.25 klur tyngka.
Na ka bynta ka jingshngian jong ka MDC Hostel ym sa buh biang sa lai ngut ki nongtrei bad ka jingmang pisa T.28 lak ka long ban siew pyndep ia ki bill ba dang sah jong ki kontraktor bad T. na ka bynta ka tnad pule ban leh ia ka jingwat bniah ia ki riti dustur u khasi ka KHADC kala mang pisa T.50 lak tyngka.
Na ka liang pyrshah kila wanrah ia ka cut motion, ia kaba la soi lang da ki lai ngut ki MDC, u bah Martle N Mukhim, u bah Jambor War bad u nongialam ka liang pyrshah u bah Titostarwell Chyne, hynrei ha dien ba la pynshai da u CEM u bah Martle Mukhin ba wanrah ia ka cut motion la wengnoh.
