Shillong, Jylliew 21: U Myntri Khynnah ka Sorkar Pdeng ba dei khmih ia ka tnat Minority Affairs, u John Barla u la kyntu ia ki briew ba kin pdiang ia ka yoga kum shi bynta jong ka jingim jong ki mynta ka sngi khnang ba kin lah ban im ia ka jingim kaba koit ba khiah.
U Myntri u la wan ban iashim bynta ha ka jingrakhe ia ka International Day of Yoga kaba phra ha Shillong, Meghalaya kum u kongsan ha kaba u la batai shaphang ki jingmyntoi kiba wan haba leh yoga man ka por.
“Ka jingpdiang ia ka yoga ka long kaba donkam. Ka rukom im mynta ka la wanrah shibun ki jingeh kum ka jingkhuslai bad kiwei kiwei. Ka yoga ka dei ka jingpynbeit ia baroh kine ki jingeh,” la ong u Birla haba u la ai jingkren ha kane ka prokram mynta ka sngi.
U la kyntu ia ki briew ba kin kut jingmut ban pdiang ia ka yoga ha ka jingim jong ki. “Nga kmen ban iohi ia ki khynnah ha kane ka prokram mynta ka sngi. Man ka longiing ka dei ban leh yoga ban pynthikna ka koit ka khiah,” u la bynrap.
U Myntri u la ong ruh ba baroh ki briew ha ka ri ki dei ban iasnoh kti lang bad ka jingpyrshang u Myntri Rangbah Duh, u Narendra Modi ba kin leh ia ka yoga khnang ba kin long kiba koit ka bhiah. Ka phang mynta u snem ka long “Ka Yoga na ka bynta baroh ki briew” bad ngi dei ban pynthikna ia kane naduh ki klas ba rit ha ki skul,” u la ong.
Ka Sorkar India ka dang rakhe ia ka International Day of Yoga (IDY) kaba phra mynta ka sngi. Namar ba ka IDY ba phra ha hap ha u snem ba ka India ka dang rakhe ia ka jingdap 75 snem ka jingioh jinglaitluid, ka Sorkar ka la pynlong ia kane ki prokram ha 75 tylli ki jaka ba kyrpang ha kylleng ka ri ha ryngkat 75 tylli ki jaka ha kylleng ka pyrthei ba la pyniaid da ki Indian embassy.
U Myntri Sorkar Meghalaya ba dei khmih ia ka tnat Health & Family Welfare, u James P. K Sangma, uba la iashim bynta ha kane ka prokram kum u symbud kongsan u la pynpaw ka jingsngewnguh ban iadon bynta ha ka jingrakhe mynta u snem. u dap da ka jingsngewkmen ba ka yoga kaba la sdang ha India ka dei kaba rakhe ha kiwei kiwei ki ri.
Kane ka dei ka kynti kaba kyrpang ia ka Yoga ka la pawnam ha kylleng ka pyrthei mynta. Ka don ki jingmyntoi kiba khraw na ka bynta ka koit ka khiah. Kam dei tang ka rukom pynryntih ia ka rukom sumar ia ka met jong ngi. Ka dei ruh ka rukom pynryntih ia ka rukom sumar ia ka jabieng.”
U Myntri u la kren ruh shaphang ka yoga kum ka lad ai jingiada na ki jingpang. Ka pyrthei mynta ka dei kaba wanrah shibun ki jingkhuslai bad katba ngi dang pyrshang ban ioh ia ka pyrthei ha kaba ka kham lah ban don ka jingiada ban ia ka jinghap ai jingsumar, ka yoga ka don ka bynta kaba khraw ban pynbeit ia ki jingpang kiba mih na ka rukom im.
U Myntri ka sorkar pdeng u la ong ba dei ban iatrei lang ban kyntiew ia ka yoga bad ka ‘Yoga na ka bynta baroh’ ka dei ka phang kaba donkam bha ban wanrah ia ka jingryntih bad ban pyniasoh ia baroh kawei ka pyrthei.
U Principal Secretary sha ka Sorkar Meghalaya, u Sampath Kumar, ka Director jong ka NEIAH Dr Neeta Mahesekar, ki khynnah pule, nonghikai bad kiwei kiwei ki heh ki hain ki la iashim bynta ha kane ka prokram ba la pynlong ha ka convocation hall jong ka North Eastern Hill University (NEHU), Shillong, Meghalaya.
Ia kane ka prokram ha Shillong la pynlong lang da ka tnat Minority Affairs bad tnat AYUSH jong ka Sorkar Pdeng ha ka jingiatrei lang bad ka Sorkar Meghalaya. Kumba 800 ngut ki briew ba kynthup ia ki samla pule ka NEIAH, ka Shillong Polytechnic bad ki shipai ha ryngkat kiwei kiwei ki la iashim bynta ha kane ka prokram.
U Myntri Rangbah Duh ka ri, u Narendra Modi u la iashim bynta lang bad ki hajar ngut ki briew ha kawei ki jingleh yoga ha madan Mysore Palace, Mysuru, Karnataka. Kane ka prokram jong u Myntri Rangbah Duh ha Mysuru ka dei ruh shi bynta jong ka prokram ‘Guardian Yoga Ring’ kaba dei ka prokram iatrei lang hapdeng 79 tylli ki ri bad ki kynhun ka United Nations ha ryngkat ki Indian Mission ha kiwei kiwei ki ri ban pyni ia ka bor pyniasoh jong ka yoga.
