Shillong, Nailur 24: U President jong ka MPCC u Dr Celestine Lyngdoh u la iathuh mynta ka sngi ba ka AICC kala pdiang ia ka shithi jong u Dr DD Lapang ba u la mih noh na ka seng Congress.
Haba kren ha ki nongthoh khubor mynta ka sngi ha Congress Bhavan u president jong ka MPCC u la ong ba na ka liang jong ka MPCC ka ai ka jingkhublei kitbok ia u Dr DD Lapang ba yn dang ioh ia ka met kaba koit ba khiah bad ha ki kam jong u baroh nangne sha khmat.
Halor ka jingon ba u Rahul Gandhi um dei u kyrtong ban long myntri rangbah duh jong ka Ri, u Dr Lyngdoh u la ong ba ia kane dei tang ki paidbah ka Ri India kiba lah ban ai ia ka sertiphiket, halor ka jingkynnoh ba la shah weng lut ki nongialam ba rim, la ong ba kane kam dei ka jingshisha namar bun ki nongialam bala rangbah ki dang bat kam ha ki kyrdan bapher bapher.
U Dr Lyngdoh u la ong ba ki nongialam ki leit bad ki wan hynrei ka party congress kan dang iaineh, u la ong ba ka khubor kaba u kwah ban phah sha baroh ki nongtrei jong ka seng Congress ba ka party kan dang iai trei shitom ban pynjop ia ka MDC bad MP ha u snem 2019. La ong ba ha ka sain pyrthei ka don ka jingkiew bad ka jinghiar ia kata kim sngewpher.
U Dr Lyngdoh u la ong ba kum u briew na poh ka Ri Bhoi District u niew burom haduh katta katta ia u Dr Lapang bad dei lyngba jong u ba u ruh u sa poi sha kane ka sain pyrthei. La ong ba u Dr Lapang u poi ban bat ha ki kyrdan bapher bapher dei namar ka seng Congress. Kum ka party kam don ei ei ban kynnoh pyrshah ia u hynrei ka shu pynshai ia kaei kaba la paw ha kine ki sngi.
