Shillong, Naiwieng 10: Ka Khasi Hills Autonomous District Council (KHADC) mynta ka sngi kala shim ia ka rai ban phah shuwa ia ka Khasi Hills Autonomous District (Khasi Inheritance of Property) Bill, 2021 ka Select Committee.
Ka jingphah ia kane ka Bill sha ka Select Committee ka long ha diren ba la mih ka jingdawa na ki MDC ka Congress ba don ha ka Liang Pyrshah ba shuwa ban pdiang ia kane ka bill don kam ban ia peit bniah shuwa bad la don kam ban phah sha ka select committee ban bishar bniah.
Ia kane ka Select Committee yn khlieh da u Chief Executive Member (CEM) ka KHADC u Bah Titosstarwell Chyne, katba u Secretary ka Executive Committee u Bah G Syiemiong un long kum u Member Secretary.
Kiwei pat ki dkhot jong kane ka committee ki kynthup ïa u Nongïalam ka Liang Pyrshah u Bah PN Syiem, u MDC na Mawhati Bah Charles Marngar, u MDC na Mawkyrwat Bah Carnes Sohtun kiba dei na ka Congress, u Bah Paul Lyngdoh uba dei u EM ka KHADC bad u Bah Lamphrang Blah, MDC ka NPP na Mawphlang.
Ha shwa kane, u MDC ka Congress na Nongstoiñ u Bah Gabriel Wahlang u la wanrah da ka amendment motion ban dawa ba ïa kane ka bill dei ban phah shwa sha ka select committee na ka bynta ban peit bad bishar bniah.
Na ka liang ki MDC ka Congress ki la pynpaw ba kan long kaba eh ban ïatai ïathir halor kane ka bill, namar kim shym la ïoh ka por kaba biang ban pule bin pa bin bad lap ruh ba ki dang don bun ki bynta kiba hap ban pynbeit.
Haba kren sha ki nongthoh khubor hadien ba la wai ka jingshongdorbar, u CEM u la ong ba ka jingdawa jong ka Liang Pyrshah ka long kaba don nongrim namar ba kim shym la ïoh bun ka por ban pule bniah ïa ka bill naba ïa ka kopi jong ka bill la sam sha ki ha ka sngi Nyngkong ka taïew.
U la ong ba ka jingshim rai ban phah ïa kane ka bill sha ka select committee kan ai shibun ka por na ka bynta ki MDC ba kin peit bin pa bin bad ban sa ai pat ïa ki jingai jingmut ki jong ki.
U la ong ba ka jingïakynduh kaba nyngkong jong kane ka committee ka lah ban shong ha ka taïew ban wan.“Ngan nym kwah ban shu ïoh jingmynjur kaba kloi kloi ha kum kane ka por namar ka dei ka bill kaba donkam bha kaba ïadei bad ka riti dustur jong u Khasi,” la ong u CEM.
U la ong ruh ba ka select committee kan sa pan ruh ïa ki jingai jingmut bad ki jingsngew jong ki nongïalam shnong, ki seng bapher bapher kiba don ka jingsngew halor ka riti dustur jong u Khasi bad nalor kane, “Ngin pan ruh ki jingai jingmut na ki riew stad aiñ halor kane ka bill,” u la ong.
La ong ka jingthmu hi ba hakhmat jong kane ka bill ka long ha ka rukom ïoh pateng ïa ka jingdon jingem jong ki kmie ki kpa, khamtam na ka bynta kito kiba don tang ki khun shynrang bad ki bym don khun satia, hynrei kam mut pat ba dei ban leh beit kumta ban sam bhah mar katjuh ïa ka jingdon jingem namar kane baroh ka shong ha ka mon laitluid jong ki kmie ki kpa.
Ha kawei pat ka liang, u la ong ba um kwah satia ba kane ka kam kan shim bun ka por hynrei ban ïoh ban wanrah biang ïa kane ka bill ha ka jingshong dorbar ka ban sa long.
