Shillong, Jylliew 08: Ka jingialang jong ka Kabinet kaba la long mynta ka sngi kala pdiang ia ka rai ban pyntrei kam noh ia ka 5th Pay Comission na ka bynta ki nonghikai deficit ha ka jylla Meghalaya. Kine ki nonghikai bad ki bym dei ki nonghikai baroh ki don 3729 ngut.
U myntri ba dei peit ia ka tnad pule puthi jong ka jylla u Bah Lahkmen Rymbui haba kren ha ki nongthoh khubor ha dien ka jingialang jong ka Kabinet u la ong ba kane ka 5th Pay Commission na ka bynta ki nonghikai deficit kan trei kam naduh ka 01 Kyllalyngkot 2017.
Haba phai sha ka jinglut kaba ka sorkar ka hap ban bei tam ha ka shisnem da kaba pyntrei kam ia kane ka 5th Pay Commission na ka bynta ki nonghikai kan long da T.84 klur tyngka bad ka arrear kaba ka sorkar ka han ban siew kan long T.126 klur tyngka. Ia kane ka arrear ka sorkar kan siew saw sien kata 25% shisien siew.
La iathuh ba ki nonghikai kin sdang ban ioh noh ia kane ka tulop kaba thymmai ka jong ki naduh u bnai ban wan. U bha Lahkmen u la ong ba ka sorkar ka kwah ban pynurlong ia kaei kaba ki dei hok ban ioh, ha kaba ia dei bad ia ka jingpymih ia ka pisa ka shong ha ka sorkar kumno ban leh ban pynmih pisa.
