Shillong, Rymphang 07: Mynta ka sngi ka kynhun ki seng bhalang ia kaba la tip kum ka Confederation of Meghalaya Social Organisation (COMSO) kala sam paidbah ia ki kot lyngkdop ban pynshai halor ka jingtrei kam jong ka Inner Line Permit.
Ia kane ka jingsam ia ki kot lyngkdop la sdang na Motphran ha kaba ki paidbah kila pdiang bad kila ia pan ruh da la de ban ioh ia kane ka kot kaba kren halor ka Inner Line Permit. Ia kaba la tip kum ka Bengal Eastern Frontier Regulation 1873.
U Bah Robertjune Kharjahrin lamphang ka COMSO haba kren ha u SP News Agency u la ong ba kane kaba ki sam mynta ka sngi ka dang dei ha ka ktien Khasi bad kan sa don ruh ka jingsam ia kine ki juh ki kot sha Garo Hills ha ka ktien jong ki ka ktien Garo, la iathuh ba mynta ki dang pynkhreh.
Ha kane ka kot lyngkdop kaba kila shon bad sam paidbah da ka COMSO mynta ka sngi kila batai bniah bha ha kaba ia dei bad ka ILP ha kane ka jylla Meghalaya. La batai ba ka dei ka jingshisha ba ILP ha Ri Lum Khasi Jiantia ka dang im haduh mynta bad don kam tang ia ka jingpynbna na u lat ka jylla ban pyntrei kam ia ka.
Namar ia kane ka la dep ban pdiang da ka United Khasi Jaintia Hills District Adoption Regulation 1952 lyngba ka kyndon ba 79 jong ka North Eastern Reorganisation Act, 1971 bad kumjuh ruh lyngba ka Meghalaya Adotion law order 1974.
Katba ia ka Garo Hills la wengnoh na ka Bengal Eastern Frontier Regulation 1873. Ha Garo Hills hap ban ioh ia ka jingsoi u President ka Ri India ban pyntrei kam biang ha ki lum Garo. Namar kata ban ioh ia ka jingpyntrei kam ia ka ILP ha baroh kawei ka jylla Meghalaya don kam ia ka jingsoi u President ka Ri India.
Ka COMSO kala pynshai ruh ba lada ioh ia ka ILP ha kane ka jylla Meghalaya ka Citizenship Amendment Act kan nym trei kam ha kane ka jylla Meghalaya bad lyngba kane ka ain kan iada na ka jingwan tuid khyllep ki briew kiba na bar.
