Shillong, Nailar 23: U myntri Khynnah ka tnad Jal Shakti Dr Raj BhushanChoudhary mynta ka sngi u la iarohia ka deiriti ba riewspah jong ka Meghalaya bad u la ong ba ka jylla ka long kaba kyrpang ha ka ri namar ka jingitynnad ka mariang bad ruh ka jingiar ka imlang sahlang.
U la ong ia kane ha ka jingiakynduh bad ki lad pathai khubor ha Shillong ha ka sngi ba lai jong ka jingwanjngoh ia ka jylla Meghalaya, hadien ba u la wanphai na South West Khasi Hills district.
U Myntri u la ong ba ka Sorkar Pdeng ka ngeit skhem ba ka roi ka par jong ka Meghalaya ka dei ban long kaba sted bad kaba kynthup lang ia baroh, kaba iaineh bad kaba iahap bad ka mariang. U la kren shaphang ki sienjam jong ka Sorkar Pdeng kiba thmu ban wanrah ia ka roi ka par kaba iaineh ha Meghalaya.
Ha kaba iadei bad ka jingkyntiew ia ki jingdon jingem ha ka thain, u Myntri u la ong ba ka Sorkar Pdeng ka la peit bniah ia ka jingkyntiew ia ki jingdon jingem ha ka jylla namar ka ithuh ia ka jing kongsan jong ka Meghalaya ha ka thain shateilammihngi.
“Hapoh ka Pradhan Mantri Gati Shakti National Master Plan, ngi dang trei ban kyntiew ia ki jingdon jingem kiba iadei bad ki surok, ki lynti rel bad ki kad liengsuin bad ruh ka rynsan digital. Kane kan plié shuh shuh ki lad na ka bynta ka khaii pateng bad kan pynthikna ruh ba ki jingmyntoi jong ka roi ka par ki poi sha ki jaka ba jynjar tam ban poi ha ka jylla,” u la ong.
U Myntri u la ong ba ka jingpeit bniah jong ka Sorkar ka dei ban don ka jingryntih hapdeng ka roi ka par bad ka jing pynneh, da kaba pynthikna ban pynneh ia ka jingitynnad jong ka mariang ha Meghalaya na ka bynta ki pateng ban wan.
Lyngba ki sienjam kum ka National Green Mission bad ka Climate Resilient Agriculture Program, ka Sorkar ka dang ai jingkyrshan ia ka jingpdiang ia ki rukom trei kiba iarap ia ka mariang ha ka rep ka riang, ki kam khlaw bad kiwei kiwei ki kam.
“Ka Meghalaya ka don ia ki jingdon jingem ba la ai da ka mariang, ki khlaw ki btap, bad ka biodiversity. Ban pynneh ia kane ka spah, ngi la kut jingmut ban pynshlur ia ka roi ka par kaba iaineh,” u la ong.
U Myntri u la ong ba ka kam jngohkai ka dei ka bynta kaba khraw ha ka jingkiew ka ioh ka kot ha Meghalaya bad u la ong ba khnang ban shim ia kane ka lad, ka Sorkar Pdeng, ha ka jingiatrei lang bad ka Sorkar Jylla, ka la sdang ia ki sienjam hapoh ka skhim Swadesh Darshan bad ka skhim PRASHAD.
U la ong ba kine ki sienjam ki thmu ban kyntiew ia ki jaka jngohkai, ki jingdon jingem ha kine ki jaka bad pyni ia ka Meghalaya kum ka jaka kaba biang bha na ka bynta ka jingleitjngohkai. “Ka thong jong ngi ka dei ban don ki kam jngohkai kiba iaineh kiba pynmih lad ioh kam, kiba kyntiew ia ka imlang sahlang, bad kiba pynneh ia ka deiriti jong ka jylla,” u la ong.
U la ong ruh ba khnang ban pynkupboria ki samla bad ki longkmie, la sdang ia ki prokram bapher bapher hapoh ka Skill India Mission bad DeenDayalUpadhyayaGrameenKaushalyaYojana.
La peit bniah ia ka jingkyntiew ia ka jingseng kam lajong, khamtam ha ka kam pynmih jain, shna tiar bad ki kam kiba iadei bad ka kam rep, u la ong da kaba bynrap ba ka Sorkar ka thmu ban wanrah ia ki lad kamai jakpoh kiba iaineh bad ruh ban kyntiew ia ka ioh ka kot bad ka imlang sahlang da kaba kyntiew ia kiba don sap bad ruh ia ka jingseng kam lajong.
Ha kaba iadei bad ki sienjam ha ka kam rep bad na ka bynta ka roi ka par ha ki jaka nongkyndong, u Myntri u la ong ba ka Sorkar ka ai ka jingkyrshan pisa, ka jingiarap ha kaba iadei bad ka teknoloji bad ki jingdon jingem ia ki nongrep, ka National Mission for Sustainable Agriculture (NMSA) bad ka skhim PM-KISAN ha ryngkat kiwei kiwei.
Ka jingwanrahia ki rukom rep organic bad ka jingtei ia ki jaka buh pyndaitthah ia ki bam ki dei katto katne ki sienjam ba la shim ban pynthikna ba ka kam rep ha Meghalaya ka kiewshaphrang ha ka rukom kaba iaineh bad kaba skhem, u la ong.
U Myntri u la iathuh ruh ba ka Sorkar Pdeng ka la kut jingmut ban pynkhlain ia ki khynhunPanchayati Raj. “Da kaba pynkhlain ia ki bor pyniaid shnong bad ka jingpynthikna ia ka jingshai ha ka jingai jingsynshar, ngi thmu ban pynlong ba ka roi ka par ka long ia baroh bad kaba peit ia ki jingdonkam jong ki briew,” u la ong.
U Myntri u la kren kyrpang shaphang katto katne ki skhim ba la saindur da ka Sorkar Pdeng ban ai jingmyntoi ia ka Meghalaya kum ka Amrit Sarovar Yojana hapoh ki skhim Rural Development, Pradhan Mantri Krishi Sinchayee Yojana (PMKSY) bad National Hydrology Project ban lumia ka data shaphang ka jingpynneh ia ka um. U Myntri u la ong ruh ba ki don 25 tylli kine ki jaitcentre hapoh ka National Hydrology Project.
Ha ka jubab ia ka jingkylli na ki lad pathai khubor shaphang ki jingkynnoh ba don ki kynrum kynram ha kaba iadei bad ka jingpyntreikam ia ka Jal Jeevan Mission ha Garo Hills, u Myntri u la ong ba ki bor ba dei peit kin sa peit ia kane ka kam bad lada lap ba ki don kum kita ki kynrum kynram, ka Tnad kan sa buh ia ka enquiry committee.
