New Delhi, Risaw 04: Ka National Crisis Management Committee (NCMC), hapoh ka jingpyniaid jong u Cabinet Secretary, u Rajiv Gauba ka la iakynduh mynta ka sngi ban peit ia ki jinglong jingman ha Sikkim.
U Chief Secretary, Sikkim u la iashim bynta ha kane ka jingialang lyngba ka video conferencing bad u la iathuhia ka Committee shaphang ki jinglong jingman mynta ha ka jylla. U la batai ruh ia ka committee shaphang ki sienjam jong ka Sorkar Jylla ban ai ki jingiarap bad ki jingpyllait im ia ki briew.
U Home Secretary u la iathuhia ka Committee ba la peit ia ki jinglong jingman baroh shi sngi man ka sngi da ka Sorkar Pdeng. Baroh ar tylli ki control room jong ka tnat Home Affairs (MHA) ki peit ia ki jinglong jingman bad la ai baroh ka jingiarap ba donkam.
Ka National Disaster Response Force (NDRF) ka la dep phah lai tylli ki kynhun bad kiwei kiwei ki kynhun ki long kiba la khreh ha Guwahati bad Patna. La phah ia ki kynhun bad ki jingdon jingem jong ki shipai bad ka Air Force ban ai jingiarap ia ka jylla ha ki kam pyllait im ia ki briew bad ki jingiarap.
Ha ka jingpeit ia ki sienjam jong ki kynhun Sorkar Pdeng bad ka Sorkar Sikkim, u Cabinet Secretary, u Rajiv Gauba u la ong ba ka jingpyllait im ia ki briew kiba sahkut ha ka Chungthang dam bad ki nongjngohkai ka dei ka kam kaba kongsan. U la ong ruh ba dei ban phah shuh ia ki kynhun NDRF bad ban pynthikna ka jingiasoh biang jong ki surok, ki lad jingiakren bad ka bording.
U Cabinet Secretary u la kular ia ka Sorkar Sikkim ba ki kynhun Sorkar Pdeng ki long kiba la khreh bad ki la kloi ban ai jingiarap.
Ha kane ka jingialang la iashim bynta lang da u Home Secretary ka Sorkar Pdeng, u Chief Secretary ka Sikkim, Secretary, ka tnat Bording, Secretary ka tnat Road Transport bad Highways, Secretary ka tnat Military Affairs, Secretary ka tnat Telecommunications, Secretary ka tnat Water Resources, RD & GR, Member Secretary, NDMA, CISC IDS, DG, IMD, DG, NDRF bad ki ophis ka tnat Kam Pohiing.
