Shillong, Risaw 31: Ka District Magistrate jong ka East Khasi Hills mynta ka sngi kala ong ba la ioh jingujor na kiba bun ba ki don ki khyrdop ban khrong pisa ha ki surok bah jong ka Ri india bad jong ka jylla bad ki surok heh ruh kumjuh kiba hap hapoh jong ka East Khasi Hills District.
Naka liang jong ka District Magistrate mynta ka sngi kala pynshai da ka jingthoh ba ka sorkar jylla kan nym shah ban don ia ki khrdop ha ki surok bah jong ka sorkar pdeng lane jong ka sorkar jylla bad ha ki surok kiba heh ka jylla ban khrong pisa jubor.
Ka jingbuh ia kine ki khyrdop kala buh ia ka jingwit ia ki nongleit nongwan bad kane kala wanrah ruh ia ka jingtyngkhuh kali, kane kala wanrah ia ka jingeh kaba khraw na ka bynta ki paidbah ba leit ba wan kumta la hukum ba baroh ki khyrdop ki dei ban khang lada ki dang don.
Ha ka juh ka por ban khanglat ia ka jinglait tuh ka khajna kumta la khang pyrshah ban buh ia kino kino ki khyrdop ban lum pisa ha ki surok bah jong ka Ri India bad jong ka sorkar jylla, ia kiba pyrshah yn pyntshitom katkum ka ain.
