Shillong, Naitung 30: K
um shi bynta na ki mat treikam ka Hynniewtrep Youths’ Council (HYC) kaba la tip kum ka ‘Save Hynniewtrep Mission’, hynne ka sngi ki dkhot ka seng ha ka jingialam u samla John Lyngdoh, Vice President HYC Shillong City, u samla Franky Kharumnuid, President bad u samla Enlang Sawian, General Secretary, ki la pynher krad ia palat 160 ngut ki bar jylla kiba wan trei bylla sngi ha ki ar tylli ki jaka ha Iew Polo.
Kine ki bar jylla ki la shah pynher krad na ka daw ba kim don ia ki kot ki sla kiba biang kiba la ithuh da ka tnad Labour ka sorkar jylla lane KHADC ba ki la lah ban trei ha ka jylla. Kine ki jaka trei ki long ka jingtei ia ka Super Market Complex, Polo bad na ka jingtei ia ka Ophis treikam ka State Bank of India, Polo. Ia ka Super Market Complex, Polo la pyntrei da ka Maxim Infrastructure and Real Estate Pvt Ltd na Shillong bad ia ka Ophis trei kam ka SBI la pyntrei da ka Sawhney Buildwell LLP kaba na Dehradun, Uttrakhand.
Ki dkhot ka seng ha ka jinghiar khynra ki la lap ba na ka jaka trei ia ka Super Market Complex ki la don 142 ngut ki bar jylla kiba napdeng jong ki tang 20 ngut kiba don ia ka laisen bylla sngi katba kiwei pat kim don satia. Katba na ka jaka trei ka Ophis treikam ka SBI la lap ba ki don 40 ngut tam eiei bad u wei ruh na ki um don kot don sla kiba biang ban sah trei bylla ha ka jylla. Ka Save Hynniewtrep Mission ka kynthup ia ka mat treikam ka seng ban nym ailad ia ki bar jylla ki bym biang kot biang sla ba kin ioh kam bylla ha ka jylla.
Ki nongialam jong ka HYC ki la ong ba kim lah sngewthuh kumno kine ki bar jylla ki ioh ban wan trei bylla katba mon ha ka jylla jong ngi katba ki samla jong ngi pat ki dang kyang ba ym don jingtrei jingktah. Kumno kine ki bar jylla ki iuh roit ia ka kyndon ba la buh da ka sorkar bad KHADC khlem da pynrung kyrteng ban ioh ia ka laisen ban wan trei bylla sha kane ka nongbah. Ka long ka jingduh kaba khraw ia ka tnad Revenue ka sorkar jylla bad wat ka KHADC ruh kumjuh, la ong u samla John Lyngdoh uba la pynpaw ba ka Save Hynniewtrep Mission ka long ryngkat ka jingthmu ban iada ia ka jingwan rung be-ain kiba na bar jylla
Ki nongialam jong ka HYC kila ong ba kila lap da la ki jong ki khmat ba ym don khynnah Khasi ba ioh ban trei bylla ha kine ar tylli ki jaka bad bun na ki hi ki dei na Assam, la ong shuh shuh une u nongialam bad uba la ong ba ka seng ka la phah ia ki bor ba dei peit ia ki jingtrei ban pyn-sangeh trei ia ki bar jylla tad haduh ban da pynbiang shwa ia ki kot ki sla katkum ki kyndon. Shuh shuh kine ki bar jylla ki la shah beh bad mih noh na kine ki jaka trei bad ki dkhot ka seng ki la maham bad kim dei ban leh pyrshah khlem ki kot ki sla ki ba biang.
Na ka liang ka seng ka la kyntu ia ki bor ba dei peit ban shim khia ha kaba ia dei bad ka jingwan rung laitluid ki bar jylla. Kum ban shu pyn-kynmaw ba ha ka taiew ba la dep, ka HYC ka la lap ba ki nongtrei bylla sngi nabar jylla ki ioh ban trei katba mon khlem ki kot ki sla wat ha KHADC ruh kumjuh bad kine ki bar jylla ki dei kiba trei ia ka Ophis ka Legislative Wing ka KHADC. Ka seng ka la pynpaw ka jingsngew khia ba na ka por sha ka por ki lap beit ba ki bar jylla ki ioh katba mon ban trei sha kane ka jylla.
