Shillong, Naitung 17: Mynta ka sngi ki bor ba dei peit ia ka District Administration kala phah ia ki pulit bad ki magistrate ha kylleng jong ka sor Shillong ban phah lum ia ki nongdie madan ha ki lynti syngkieng ha kylleng kane ka nongbah Shillong.
Kane ka jingphah lum ka long khatam eh ha ki bynta jong ka Garikhana bad ki bynta jong ka Stand jeep ha kaba kiba bun ha kine ki bynta ki ba die ha khmat dukan jong ki briew dei kiba die jhur, die soh. Ki pulit bad ki Magistrate ki la leit hi da la de ban bthah ia ki nongdie ba kin lum noh.
Kane ka jingbthah ia ki ka long ba kam pat shah ban ia die bad ban ia lum briew ha ki jaka paidbah ha kane ka por ba ka sorkar ka dang ialeh katba lah ban teh lakam ia kane ka khlam COVID-19 ha ka jylla baroh kawei.
Na ka liang jong ka tnad ka koit ka khiah ruh kala pynkih ruh ia ki jingbtah ia ki paidbah kumno ban leh ha kaba ia dei bad ka jingiada ia kane ka jingpang da kaba ia jngai iwei na iwei bad dei ban deng mask ha ki jaka paidbah.
