Shillong, Nohprah 21: Ka Khasi Students’ Union lyngba ka Education Cell hadien ba ka la ioh ïa ka jingujor na ki samla pule ka jylla ki ban ïakhun ïa ka examine CSIR NET exam 2023 ka ban long ha ka 26,27,bad 28 tarik u Nohprah 2023, ki ba hap ban leit ïakhun ïa kane ka exam shabar jong ka jylla kum sha Jorhat bad Dibrugarh.
Ka seng mynta ka sngi ka 21 tarik u Nohprah 2023, ha ka jingïalam u samla Richest Malngiang bad u samla Shelkitbok Kharbani Assistant Education Secretary CEC ka la leit ban ïa kynduh ïa u myntri ka tnad pule jong ka sorkar jylla u Rakkam A Sangma ha ka ophis treikam jong u ha Secretariat.
Ha kane ka sngi la don ryngka ruh u Adviser to the education Minister, government Meghalaya u bah Himalaya Shangpliang. Ka seng ha kane ka jingïakynduh ka la ïoh ban ïakren bad pynpaw halor kane ka jingeh jong ki samla pule ki ban ïakhun ïa kane ka examine, hadien ka jingiakren bad ki nongïalam iong ka seng.
Na ka liang jong u Minister u ba dei khmih ïa ka pule puthi u la kular ba un shimkhia mardor ïa kane ka kam, bad ha khmat jong ki nongialam ka seng hi u la phone sha u senior Director NTA ban khmih bniah ïa kane ka kam bad ban pyntikna ba ki samla pule ka jylla ki dei ban ïoh thoh ïa kane ka examine hapoh ka jylla la jong.
