Shillong, Kyllalyngkot 09: Mynta ka sngi u myntri rangbah ka jylla u Conrad K Sangma u la plie ia ki skhim kiba la dep ban pyntrei bad kum juh ruh la buh mawnongrim ia ki skhim kiba yn sa pyntrei noh ha kine ki khyndait sngi kiba hap ha South bad North Garo Hills District.
Ha South Garo Hills District u myntri rangbah ka jylla u la plie ia ka skhim sam um kaba dei hapoh Baghmara ia kaba la bei pisa lyngba ka NESIDS bad kum juh na ka sorkar jylla, kane ka skhim kan pynbiang um ia ki 16 tylli ki shnong hapoh katei ka jaka.
U Myntri Rangbah ka jylla u la ong ba hapoh kane ka jingialam ka party NPP ia ka sorkar MDA bun ki skhim la pyntrei ha South Garo Hills District, u myntri rangbah ka jylla la ong ba u sngew kmen ba tang hapoh ar snem ba la buh mawnongrim la lah ban pyndep ia kane ka jingtrei.
Ha kane ka juh ka sngi u myntri rangbah ka jylla u la plie ruh ia ka Circuit House ha Baghmara, nalor kane la plie ruh ia ki iing kiba la shna kyrpang na ka bynta ki long iing kiba duk kaba ki nongtrei sorkar kin sa ioh ban shongwai ha ba ki ioh ban leit trei shapoh katei ka District.
Ha North Garo Hills laplie ruhia ka Power Sub Station ha Adokgre kaba hap ha North Garo Hills District da ka jingplie ia kane ka jaka kan iarap ban pynioh ia ki bor ding sha ki shnog kiba don sawdong katei ka jaka, u myntri rangbah u la plie ruh ia ka madan ialehkai ha juh ka jaka kaba u kpa jong u la angnud ban pyndep ia kane ka madan ialehkai ia kaba la lah ban pynurlong mynta ka sngi.
Ha kane ka sngi labuh ruh ia u mawnongrim ban pynmih bor ding na ka sngi bad kane kan iarap ha kaba pynioh bor ding sha ki nongkyndong da ka jingiatreilang jong ki paidbah ha Chenangre bad ha kane ka juh ka sngi la buh ia u mawnongrim ban shna ia ka iew jong ki nongrep ha Baghabatta kine ha North Garo Hills District.
Ha shnong Manikganj u myntri rangbah ka jylla u la buh ia u mawnognrim ban shna ia ka Manikganj Cultural Auditorium hapoh North Garo Hills District, kane ka long ban pynneh pynsah ia ka riti dustur jong ki Rabha.
U Myntri Rangbah ka jylla u la leit ban jurip ruh ia ka jingpyntrei ia ka surok na Bajengdoba sha Resubelpara kaba leit sha Mendipathar sha Damra kaba pyniasoh sha Bajengdoba, ka jingtrei ban pynbha ia kane ka surok ka dang iaid sha khmat.
