Shillong, Nailur 10: U Nongaibuit ka tnad ka pule puthi ka sorkar jylla u bah HM Shangpliang mynta ka sngi ka 10 tarik u Nailur 2024, ula plie paidbah ia ka hospital ba sumar dawai kynbat ha ka West Khasi Hills kaba la tip kum ka Meghalaya Traditional Healing Clinic.
Ia kane ka hospital ka ba don ha ka shnong Sohpian, West Khasi Hills ia ka bala tei ha ka jinglut kaba T. 8 lak tam ia kaba la bei tyngka da ka Bio Resources Development Centre.
Kane ka jaka ai jingsumar kynbat ka dei ka jaka ha ka ba baroh na ki nongsumar kynbat ki ba don ha kine ki thain kin ioh ban wan da ka pali ha ka ba kin ioh ban sumar ia ki jingpang bapher bapher.
Kane ka jaka aijingsumar ka don ia artylli ki committee ki ba khmieh bad peit ia kane ki ba kynthup ia ka management committee bad ka sub committee ka ba dei ban peit bad khmieh ia ki kam technical.
Ha kane ka sngi plie ia kane ka jaka ai jingsuma la wan ba iadon lang ruh da u bah M Byrsat u ba dei u Ex- MLA ka Nongstoin, ka Dr JP Lyngdoh Senior Scientist ka BRDC, u Dr M Nongrum DHMO, u bah S Wahlang Sordar ka shnong Sohpian, ki nongai dawai kynbat lem bad kiwei kiwei de.
