Shillong, Lber 9: U symbut myntri rangbah ka jylla u Bah Prestone Tynsong mynta ka sngi u la plie ia ka jaka otdoh kaba katkum kane ka juk kaba mynta kaba don ha Mawiong bad kane ka dei ka jaka otdoh kaba nyngkong eh ha North East India, ia kaba la tei ha ka jinglut kaba T.21.65 klur tyngka.
Na ka liang jong u myntri symbut rangbah jong ka jylla u la ong ba, ka juh dei ka rukom ia ki briew ban pdiang ia kano kano ka kam kaba thymmai ka long kaba eh shibun dei na kane ka daw kiba wan ban otdoh ha kane ka jaka ki dang long tang 45% ei ei kiba dei na kane ka nongbah Shillong hynrei 65% ki dang iai ot kumba ki juh leh ka sorkar kan nym pynbor ia ki hynrei ka kwah ban iohi ba ka jingotdoh ka dei ban long kaba khuid.
Haba kren ha kane ka sngi, u bah Prestone u la ong ba lada but katkum ka ain kala long kaba eh ia ka jylla Meghalaya ba kan dang ioh otdoh, hynrei da ka jingshim khia jong ka sorkar la lah ban pynlait na kane ka jingeh da kaba lah ban pyndep ia kane ka jaka otdoh bad plie ia ka ha ka por kaba biang.
Ha kaneka jingialang plie ia kane ka jaka otdoh na Mawlai Mawiong, u myntri ka sorkar u la pynbna paidbah ba ynsa shna shuh ia kiwei ki jaka ot doh ha kylleng ka jylla bad ia kane yn sdang da kiba rit na Mawlai Phudmawri bad ha kiwei kiwei ki jaka. Ka sorkar ka sngewkhia bha ia kane ka bynta.
Haba kane ka sngi u bah Prestone u la pynshai paidbah ba da ka jingplie ia kane ka jaka otdoh kam mut ba ka sorkar kan pynthud ia kane ka kam, hynrei ka sorkar ka kwah ba ki jaka otdoh ka dei ban long kaba khuid ban ioh ia ka jingkoit jingkhiah. La ong ba ki briew mynta ki ioh ia ki jingpang kiba laiphew jait namar ba ka doh kaba bam kan long kaba khuid.
Ha kane ka sngi la pynbna ruh ba ka sorkar kan pynshlur ban ri ia ki jingri khlem da pyndon kam dawai bad na ka liang jong ka sorkar jylla ha u bnai Iaiong kan sa ioh ia ka ram na ka sorkar pdeng T.220 klur tyngka na ka bynta ban pynkhlain ia ka kam ri Sniang, Masi bad ri sniang.
Ha ka jingkren jong u bah Process T Sawkmie MLA jong ka Mawlai,u la ai ka jingiaroh ia ka sorkar kaba la lah ban pynurlong ban plie ia kane ka jaka otdoh kaba don hapoh Mawlai. Na ka liang jong u kum u MLA kane ka jaka u la kular ban ai ia ka jingiatreilang ban peit ba kane ka jaka otdoh kan long ka jingmyntoi ia ki paidbah.
Kiwei kiba la kren ha kane ka sngi ki long u bah G Warlarpih Vice President jong ka Khasi Jaintia Butchers Association (KJBA) ha ka jingkren ka jong u la ong ba ka long ba ha kane ka jaka don kam ban shna ia ka jaka set ia ki masi kaba lah ban ngiam kumba 1000 tylli ki masi. Ha kane ka sngi la don bun ruh ki ophisar na ka tnad ri marad jong ka sorkar ryngkat ki nongotdoh. Ha kane jaka otdoh kaba la plie mynta ka sngi ha Mawlai Mawiong, ha ka sngi sngi lah ban ot haduh 240 tylli ki Masi, 240 tylli ki sniang, 160 tylli ki blang.
