Shillong, Nailar 17: U Myntri rangbah ka jylla u Cornad K Sangma mynta ka sngi u la plie ia ka Mawlai Police Outpost ha Umshing Mawkynroh ia kaba la iehteng mynta la shiphew snem naduh ba la tei ia kane ka iing.
Ha dien ba u myntri rangbah u la soi nyngkong ia ka register jong kane ka police out post, u la kren ha ki pulit kbia dei ban trei ha kane ka jaka ha kaba u la ong ba ki dei ban kynmaw ba ka jingdon jong ki ka long ban iarap ia ki paidbah.
Ha kane ka juka ka sngi u myntri rangbah ka jylla u la pynlait paidbah ruh ia ki 14 tylli ki bike ia kiba la tip kum ka “First Responder Bikers” ba dei jong ka tnad pyniaid kali. Kine bike ki long na ka jingtrei kam kaba shispah sngi jong ka sorkar kaba la buh thong da u myntri rangbah ka jylla.
Kine ki Bike kiba la pynlait mynta ka sngi ka long ban iarap ia ki pulit na ka bynta ban pyniaid ia ki kali, ha ka juh ka por ban iarap ia ki briew kiba ngat ha ka jingtyngkhuh kali bad kiwei kiwei ki jingdon kam jong ki paidbah wat ban iarap ban pynpoi iaki briew sha ki jaka ai jingsumar.
