Shillong, Naiwieng 11: U Myntri Rangbah ka jylla u Conrad K Sangma mynta ka sngi u la plie ia ka Rongjeng Civil Sub – Division kaba hap hapoh jong ka East Garo Hills District. Ha ka jingiadonlang u Deputy Speaker Timothy D Shira, MLA Jim Sangma, Thomas A Sangma, Brening Sangma, Rupert Momin bad u Pongseng Marak.
Ka jingdawa ban kyntiew ia kala iaid kumba sawphew snem ei ei, dei tang ha u snem 2017 bala kyntiew ia ka sha ka Administrative Unit bad la pynkiew ia kane sha ka kyrdan Civil Sub Division da ka jingpynbna jong u lat ka jylla ha ka sngi Thohdieng.
Kane ka Civil Sub Division kan peit ia ki 180 tylli ki shnong kiba hap hapoh jong ka Rongjeng C&RD block, ha ka jingkren u myntri rangbah ka jylla u la pynpaw ia ka jingsngew kmen ba la lah ban pynurlong ia ka jingangnud ki paidbah la bun bun snem mynta bad u Reuben Momin un long u SDO ba nyngkong kane ka Civil Sub Division ba thymmai.
U myntri rangbah ka jylla u la ong ba u kpa jong u u Purno A Sangma bam kwai ha dwar u blei u don ka jingiadei ba jan bad ki briew kane ka thain Rongjeng, la ong ba ka dei ka jingpyrshang jong kane ka sorkar MDA ban don shuh shuh ki Civil Sub Division ban pynjan ia ki jingtrei ka sorkar sha ki paidbah.
U Myntri Rangbah la ong ba ka sorkar ka shim khia ban wanrah ia ka jingsynshar kaba lah ban ai ka jingshakri sha ki paidbah ia kane la kren da u myntri ka sorkar pdeng ha ka jingwan jong u sha Shillong kine ki sngi kiba la dep ban wan peit ia ka jingpyntrei ia ka skhim Jal Jeevan Mission.
U Myntri rangbah ka jylla la ong ba ka jylla Meghalaya kala lah ban pyntrei kam ia ka skhim MGREGS ha ka rukom kaba biang bad kane kala kiew sha ka T.1600 klur tyngka, katba ka jylla Nagaland bad Manipur kila lah ban pyntrei kam tang kumba T.600 haduh T.700 klur. Ka jingpyntrei kam ia ka skhim FOCUS ka long ban iarap ia ki nongrep ban ioh ia ka bai seng.
U MLA kane ka jaka u Jim Sangma u la pynpaw ia ka jingsngewnguh ia u myntri rangbah ka jylla bala pynurlong ia ka jingangnud ki paidbah ba mynta ka sngi la plie ia ka Rongjeng Civil Sub Division ia kaei kaba u Purno A Sangma bam kwai ha dwar u blei u lajuh kren ban shna ia ka Rongjeng Civil Sub Division.
