New Delhi, Nailur 19: U President jong ka India, u Ram Nath Kovind u lah plié ia ka jingialang jong ki Vice Chancellor jong ki skul ban jong ka Sorkar pdeng, ki Director jong ki jaka pule ba kyrpang jong ka Tnat Pule puthi jong ka Sorkar Pdeng bad kiwei kiwei ki Tnat Sorkar Pdeng mynta ka sngi lyngba ki bor internet.
U Myntri ka tnat Pule puthi jong ka Sorkar Pdeng, u Ramesh Pokhriyal ‘Nishank’; u Myntri khynnah jong ka tnat pule puthi u Sanjay Shamrao Dhotre, u Secretary Higher Education u Amit Khare; Chairman, Drafting Committee jong ka NEP, Dr. K. Kasturirangan ryngkat bad kiwei kiwei ki heh Sorkar jong ka Tnat Sorkar pdeng, UGC bad AICTE ki la iadonlang ha ka jingialang.
Ka National Education Policy ka thmu ban pynkylla ia ka rukom ai jinghikai kaba lah ban kot bor sha ki jingdonkam jong ka spah snem ba 21 lyngba ka jingpynthikna ba baroh ki ioh ka jingpule kaba bha.
Ka don ka thong ban pynkylla ia ka imlang sahlang kaba ryntih ha ka pule pithi da kaba pynioh ka jingpule kaba bha sha baroh, la ong u President jong ka India, u Ram Nath Kovind ha ka jingai jingkren ha ka jingialang plié ia kane ka jingialang.
Da kaba iaroh ia ki jingpyrshang jong ka Tnat Pule Puthi bad u Dr. Kasturirangan bad ka kynhun jong u, kiba lah pynkhreh ia kane ka policy, u President u la ong ba ia ka Policy lah pynkhreh hadien ka jingiaphylliew jingmut kaba sani bha bad 2.5 lak ki gram panchayat, palat 12,500 ki kynhun ha ka imlang sahlang bad kumba 675 tylli ki distrik kiba lah ai palat 2 lak ki jingai jingmut kaba pyni ia ka jingsngewthuh ia ka jinglong jingman.
Da kaba pynshlur ia ki jaka pule jong ka higher education, u President Kovind u lah ong ba kine ki jaka pule ki don ka jingkitkhlieh kaba khraw ban pynlong ia ka India kaba khlain bor ha ka pule puthi. Ka standard ba lah buh da kine ki jaka pule yn bud ruh da kiwei kiwei ki jaka pule.
U President u lah ban ba ki fundamental principle jong ka policy ki kynthup ka jingsaindur bad ka rukom pyrkhat thymmai khnang ban pynshlur ia ka jingshim ia ki rai ba bun nongrim ha ka jingpeit bniah bad ka jingsaindur thymmai.
U lah kdew sha ka Bhagvad Gita bad ka jingiakren hapdeng u Krishna bad Arjun ha kaba batai shaphang ka jingdonkam ban don ka jingiakren hapdeng ki nonghikai bad ki nongshah hikai.
Ka NEP ka thmu ruh ban pynshlur ia ka rukom pyrkhat kaba kongsan bad ka mynsiem ban kylli jingkylli. U la ong ba da ka jingpyntreikam ia ka NEP 2020 kan wanrah biang ia ka nam jong ka India kum ka jaka kaba tbit bha ha ki kam ai jinghikai kumba ju long ha ki por jong ka Takshashila bad Nalanda.
U President Kovind u lah batai ia ki mat ba thymmai jong ka NEP, da kaba ong kan wanrah ruh ia ka rukom jong ka Academic Bank of Credits. Kan buh jingtip shaphang ki report jong ki jingpule bapher bapher jong ki khynnah khnang ban ioh ban ai degree ia ki, da kaba peit ia kine ki report.
Kane kan ailad ia ki samla pule ka jinglaitluid ban jied ia ki jingpule katkum ka jingtbit ha ka sap treikam jong ki, ka jingshemphang lane ka jingnang jingstad nalor ka jinglah ban rung bad ban mih ha kano kano ka por ba ki kwah. Ka jingdonkam ban peit bniah ia ka B.Ed, ki jingpyntbit ha ka sap treikam bad jingpule lyngba ki bor internet lah kynthup lang ha kane ka policy, u la bynrap.
Ha kane ka jingai jingkren, u President u lah pynpaw ruh ba ka thong jong ka NEP 2020 kalong ban kyntiew ia ka jingdon bun ki briew kiba kwah ban pule ha ki kyrdan pule ba kham shajrong ka ban kot sha ka 50 percent hapoh u snem 2035.
U la ong lah ban pyndonkam ba ka rukom pule online ban kot sha kane ka thong khamtam ha ka jinglah ban ai jingnang jingstad sha ki samla pule kynthei lane sha kito ki bym lah ban poi sha ki jaka pule kumjuh ruh ki samla pule kiba nabar ri.
Ha kaba kdew sha ka jingtip ba lah ioh, u lah bynrap ba katkum ka All India Survey na ka bynta ka Higher Education jong u snem 2018-19, ka Gross Enrolment Ratio (GER) na ka bynta ki samla kynthei ka kham bun khyndiat ban ia ki shynrang. Hynrei, ka jingdon ki samla pule kynthei ka duna bha ha ki jaka pule kyrpang jong ka ri bad ka kham duna shuh shuh ha ka liang ka jingpule technical.
Da kaba ban ba ka NEP ka phaikhmat halor ka jingryntih bad ka jingkynthup lang ia baroh, u la ong ba kum kane ka jingiapher hapdeng ki kynthei bad shynrang ha ka higher education dei ban pynbeit.
U President u la ong ruh ba kadei ka bynta jong u khlieh nongpyniaid jong ki jaka pule ka ban wanrah ka jingkylla ha ki nonghikai bad ki khynnah pule bad kumta ki khlieh nongpyniaid jong ki kynhun kidei ban shimkhia bha ha ka jingpyntreikam ia ka policy.
