Shillong, Jymmang 01: Ki hati khlaw mynta u snem kila poi biang sha shnong Rajai-A kaba hap ha South West Khasi Hills District,ha khappud bad a Bangladesh bad ha kane ka jingwan mynta ka kynti kila wan haduh 12 tylli bad kila pynjot ia ki jaka rep hapoh katei ka shnong.
U Jacman Shira u wei na kitrai bri bala shah pynjot ha ki hati khlaw mynta ka sngi la pyntip ha u SP News Agency ba kine ki hati kila poi mynta ka jan miet bad kila pynkhyllem ia ki dingkwai bad kiwei ki marrep ha katei ka shnong mynta ka sngi.
La iathuh ruh ba ymd ei tang ba ki pynkit ia ki jaka rep hynrei kila pynjot ruh ki jaka ring um kiba pynpoi um sha shnong Rajai-A bad Mawpyllun, kane ka jingwan ki hati khlaw kala pynshong syier iaki nongshong shnong namar kim tip aiu kine ki hati khlaw kin leh.
La iathuh ba kine ki hati khlaw kila wan ar snem lynter mynta sha kane ka jaka bad ki pynjot ia ki jaka rep bad kane kala ktah ia ki nongrep bad na ka liang jong ka tnad khlaw ba dei peit ia ki mrad khlaw kam shym la ai jingiarap ia ki nongrep kiba la shah pynjot ha ki Hati.
La kyntu ia ka tnad khlaw ba kan thaw lat kumno ba kine ki hati kin ioh lynti ban iaid khnang ba kin shym shah pynjot ki jaka rep, lada ki hati ki wan man ka por ban pynjot ia ki jaka rep kan long ka jingduh kaba khraw ia ki nongrep, la ong u Jacman Shira.
