Shillong, Risaw 20: Ka met jong u Archbishop Rev Dominic Jala kala poi mynta ka sngi ha Guwahati bad yn buh shimiet ha iing kmie ha Mawlai Phudmawri bad la shai ka sngi yn rah ia ka sha iing mane bah ban ai lad ia ki paidbah ban leit jngoh khatduh shuwa ban tep don burom ha ka balang.
Ha kane ka jingleit shaw ia ka met jong u Archbishop na kad liengsuin Guwahati, nalor kiba ha iing bad ki phadar la don lang ruh ki nongialam seng sain pyrthei na kane ka jylla Meghalaya kiba kyntup ia u myntri rangbah ka jylla u Conrad K Sangma, bah Lambor Malangniang, Bah Himalaya Shangpliang, Dr Amparren Lyngdoh.
U Myntri khynnah ba rim jong ka sorkar pdeng u K J Alphons u la wan lang sha Guwahati ban ia synranlang ia ka met jong u Archbishop. Kiwei kiba la ia don lang ki long u Bah Ronee V Lyngdoh, u James K Sangma.
Ha kane ka sngi da ki bun spah ngut na ka liang jong ki paid riewngiet bad kiwei kiwei ruh kiba la ia poi lang sha Guwahati ban leit shaw ia ka met jong u Archbishop na kad liengsuin Guwahati bad mynta ka miet kan poi sha Shillong ha kaba ynbuh shimiet ha iing kmie ha Mawlai Phudmawri.
