Shillong, Naiwieng 02: Ka kynhun jong ki 14 ngut ki nongthoh khubor na Maharashtra ki la pynkut ia ka jingwanjngoh ia ka Meghalaya da kaba leit sha Shillong Press Club mynta ka sngi.
U President jong ka Shillong Press Club, Bah David Laitphlang u la pdiang burom ia kane ka kynhun ki nongthoh khubor. Kine ki nongthoh khubor ki la iakren bad ki nongthoh khubor na Shillong ha kaba la don ka jingiakren shaphang ki jingshem jong ki ha kine ki ar tylli ki jylla.
U President ka Press Club u la batai shaphang katto katne ki sienjam ba la shim na ka bynta ka bha ka miat jong ki nongthoh khubor ha Meghalaya. Ki nongthoh khubor na Shillong ki la iohsngew shaphang ki rukom treikam jong ki nongthoh khubor ha Maharashtra bad ki jingpynbiang kiba don ha katei ka jylla na ka bynta ka bha ka miat jong ki nongthoh khubor.
Ha kane ka jingwan kaba 3 sngi, kane ka kynhun jong ki nongthoh khubor ka la iakynduhia ki kynhun bapher bapher bad ruh ki riew pawkhmat jong ka jylla kiba kynthup u Lat ka jylla, u PhaguChauhan ha ka 31 tarik u Risaw.
Ki la iakynduhia u DG Assam Rifles Lieutenant General P C Nair ha Headquarter Assam Rifles, Laitkor. Ha ka jingiakren bad u DG, ki la iakren shaphang ka jingshngain ha ka thain shateilammihngi, ki jinglong jingman ha Manipur bad ki jingeh ba kane ka kynhun ka iakynduh.
