Shillong, Rymphang 11:Ka Nanotechnology Departments jong ka skulbah North-Eastern Hill University (NEHU) shillong, ha ryngkat ka jingïatrei lang bad ka IIT Bhillai ka la ïoh ban pynlong ïa ka jingai jingpynshai ba shisngi halor ka phang ‘Sensitisation of App Connecting Housemaids with Prospective Employers’.
Ka jingthmu jong kane ka jingai jinghikai ka long ban pynsngew thuh halor kawei ka ‘app’ kaba la ai kyrteng “Maidful” . kane ka ‘app’ ka long ban wanrah ka jingiajan ha pdeng ki nongtrei ïingbriew bad ki trai ïing, kan wanrah ruh ïa ka jingshngaiñ, ka jinglong ba paka bad kaba shai. Ia kane ka ‘app’ kaba don ha ka ktien Khasi bad Phareng, la shna ïa kane ka ‘app’ da ka jingïarap bei tyngka da ka IBITF.
Ia kane ka jingai jinghikai la wan ban plie da Prof. Nirmalendu Saha, Vice-Chancellor (I/C) ka NEHU, kum u kongsan, u Bah Longshai Nongkhla, Rangbah Shnong of Mawkynroh kum u symbud kongsan,ha ryngkat ka jingïadonlang u Prof. Md. Iftekhar Hussain, Dean of School of Technology, NEHU, ki nongtrei ïingbriew ki ba dei na ki bynta jong ka Mawlai bad kiwei kiwei.
Ha ba ai jingkren ha kane ka jingïalang na ka liang u Prof. Nirmalendu Saha, u la ai khublei ïa kane ka kynhun wadbniah napoh NEHU bad IIT Bhillai ki ba la trei shitom ban wanrah ïa kane ka ‘app’.
U la ai ruh ka jingïaroh ïa ka jingpyrshang jong ki nonghikai, ki nongwad bniah, bad ki nongpynwandur kiba la trei shitom ban pynmih ïa kane ka ‘apps’. U la ong ruh ba ka jingthmu jong kane ka ‘app’ ka long ban ai ka jingshakri ba kyrpang ïa ka imlang sahlang
“Ka jingwad bniah bad ai jinghikai ka dei ka jingthmu ban kyntiew ïa ka imlang ka sahlang, bad kane ka ‘projek’ ka dei ka nuksa kaba paka bad ka thong jong ka ‘department’ u la ong.
U la ong ruh ba ki nongtrei bylla sngi ki dei u budlum jong ka ïoh ka kot ha ka jylla, hynrei bunsien ki ïakynduh ïa ki jingeh kiba kum kine. “Ka jingdon jong kane ka ‘app’ kan wanrah ïa ka rukom treikam kaba la buh ryntih, kaba shai, bad kaba shngain” u la ong.
Ha kane ka jingïalang la wan ban ïashim bynta da palat 40 ngut ki nongtrei ïingbriew ki ba shong basah ha poh ka shnong Mawlai, ha kaba ki la ïasam ïa ki jingïashem bad ki jingeh jong ki, da kaba ai jingmut ban pynbha shuh shuh ïa kane ka ‘app’. Ka NEHU ka khmih lynti ban bteng ka jingïatreilang bad ki nongshong shnong ban pynthikna ïa ka jingpyntreikam kaba jop ïa ka ‘Maidful app’ ha kane ka thaiñ.
