Shillong, Naitung 12: U Myntri Sorkar Pdeng ba dei khmih ia ka Tnat DoNER bad Communications, Jyotiraditya Scindia ha ka jingleit jong u sha North Eastern Council, Shillong mynta ka sngi u la pyllait paidbah ia ka web portal North East Region Agri Commodity E-Connect (NERACE) bad ka mobile application, ba la saindur ban ai jingmyntoi ia ki nongrep bad ki nongthied ha ka thain shatei lammihngi.
Ka NERACE app kadei kaba thmu ban ai jingkyrshan ia ki mar rep bad ki mar horticulture kum ki musla, ki soh, ki jhur, ki shana dai, ki cereal, bad ki mar ba mih ha ki khlaw.
Ka jingthmu kalong ban pynioh ia ki iew kiba kham biang na ka bynta ki nongrep, ki lad iadait dor kiba biang, ka jingbuh dor kyrpang, bad ka jingioh ia ki jingtip ha ka por kaba biang. Kan plie lad ruh ia ki nongthied ban iakynduh markhmat bad ki nongdie, ka jingioh ia ki mar kiba bha, ka jingsiew jingdiah, ka jingpynkhreh, ki jingiadait dor, ka jingkyrshan ha kaba iadei bad ki kam logistic, bad kyntiew ia ki jingiadei kiba jrong samoi.
Mynta, ka thain shatei lammihngi ka don 20 tylli ki mar ba la ioh jingithuh GI kiba kham pher, kiba remdor, bad kiba don kyrhai ki jingmyntoi ha ka koit ka khiah. Hapoh kawei ka rynsan, kan ai ka jingkyrshan ha ka ktien Phareng, Hindi, Assamese, Mizo, Manipuri, Nepali bad Khasi.
Haba kren halor ki jingmyntoi jong ka NERACE web portal bad ka app, u Myntri u la ong, ka jingangnud ia ka India kaba lah ban kyrshan hi dalade- Atmanirbhar Bharat bad ka Viksit Bharat yn lah ban pynurlong haba ngi don ia ka Atmanirbhar Northeast bad ka Viksit Northeast.
Haba phi kren shaphang ka Atmanirbhar Northeast bad ka Viksit Northeast kata ka jingshisha ka shong tang ha ka Viksit bad ka Atmanirbhar Annadata – ki nongrep jong ka thain shatei lammihngi bad nga ngeit skhem ba lada phi peit ia ka jinglong jingman jong ka India kaba thymmai kaba lah ban kyrshan hi dalade.
Ki nongrep kidei ban long kiba hakhmat eh na ka bynta kata ka jingkylla kaba kyrpang lyngba ka NERACE app, ki nongrep jong nga bad ki Annadata jong nga ha ka thain shatei lammihngi ym tangba kin ioh ka jingpyniasoh bad ki iew hapoh jylla, ha ka thain shatei lammihngi bad ha ka ri hynrei yn pyniasoh sha kylleng ka pyrthei.
Bad kane ka app kan pynkhlain ia ka bor jong ki Annadata jong ngi ban poi sha kylleng ka pyrthei bad kin iasoh bad ki nongpynmih mar, ki nongthied bad ki nongai jingshakri, kan wanrah ruh ia ka jingsngewsarong ha ki nongrep jong ngi.”
U Myntri u la ong ba ka NE-RACE kan long ka bynta ba kongsan ban buh ia ka thain shatei lammihngi kum ka jaka pdeng jong ki mar horticulture ba shongdor. Kan pynlong ia ki nongrep jong ka thain ym tang ki nongpynmih mar hynrei kumjuh ruh kum kiba iatreilang ba shaniah, u la bynrap.
U Scindia u la pyniaid ruh ia ka jingialang peit bniah ba iadei bad ki skhim ba dang pyntrei mynta bad ki projek ha kaba ka la don ka jingpynshai ha ka draft ba nyngkong jong ka NER Vision 2047 na u Angshuman Dey, Secretary jong ka NEC, ryngkat ki jingpynshai na u Professor Mahendra Lama, Chairman jong ka Drafting Committee.
Ka vision document ka don phra tylli ki thong na ka bynta ka roi ka par jong ka thain shatei lammihngi, kynthup ka jingsdang jong ka kum ka South Asian power hub, ka jingpyndonkam ia ki thain khappud kum ki lad ki lynti, ka jingkyntiew ia ka kum ka jaka kaba khuid.
Ka jingthaw ia ka economic corridor, ban long ka jaka pdeng na ka bynta ki jingpule ba iadei bad ka suinbneng ha ka thain Himalaya jong ka ri, ka jingkyntiew ia ki kam ai jingsumar bad ki kam jngoh kai, ka ban long kum ka jaka pdeng ia ki samla bad ka deiriti, bad kaba wanrah ruh ia ka jingshongsuk shongsain.
Ka la don ruh ka jingialang thung dieng da u myntri, kaba la aiti sha ka jingkynmaw burom ia ka kmie jong u hapoh ka prokram “Ek Ped Maan Ke Naam” (uwei u dieng ha ka jingkynmaw ia ka kmie). U la iakren ruh bad ki nongrep kiba ioh jingmyntoi na ki projek kiba iadei bad ka rep ka riang ba bei tyngka da ka NEC.
Hashuwa kane u Myntri DoNER u la pynlong jingialang bad u Myntri Rangbah, Conrad K Sangma ha kaba la iakren shaphang ka bor treikam bad ki lad ki lynti kiba don.
Na ka liang jong nga kum u Myntri ka tnat DoNER, nga la pyni ia ka lynti ba ngi donkam ban shim ha ka thain shatei lammihngi haba peit ia man kawei pa kawei ka jylla na ka bynta ka jingdon ka jingkhlain lypa haba iaid shakhmat nangne bad ban lah ban tei ia kata.
U la lyngngoh shisha ia ki jingthmu ba u Myntri Rangbah u don na ka bynta ki jaka bei tyngka ha New Shillong, u la ong, da kaba bynrap ba la iakren ia ki jingthmu halor kumno yn tei ia ka nongbah ba thymmai kaba don ka jingkhlain jong ka deiriti da kaba peit ia ki jingkhlain tynrai kum ka kam jngoh kai, kam rep bad IT bad kumno ban tei ia kata na ka bynta ka ViksitPurvottar.
“Ngin bteng ban iatreilang, ym tang ha katto katne ki projek ha Meghalaya hynrei kumjuh ruh halor ka jingpynkhreh treikam kaba heh kaba iadei bad kiwei kiwei ki bynta jong ka thain shatei lammihngi bad 36 tylli ki jylla bad ki UT kiba don hapoh ka India bad ruh ha kaba iadei bad ki para marjan jong ngi. Ka kam ka long kaba bun bad nga khmih lynti ban iatrei lang bad u Myntri Rangbah,” la ong u Scindia.
U Myntri DoNER u la ban jur ia ki sienjam jong ka sorkar pdeng hapoh ka jingialam jong u Myntri Rangbah duh, Narendra Modi ban wanrah shakhmat ia ka thain shatei lammihngi. U Myntri Rangbah duh u la phaikhmat ym tang sha ka Look East Policy hynrei sha ka Act East Policy.
U la ong, “U la peit ia ka thain shatei lammihngi kalong kaba jngai tam jong ka ri sha ka jinglong ka jaka rung kaba nyngkong jong ka ri, ka khyrdop jong ka ri bad haba ki kjat sngi ki ktah ia ka ri India, ki ktah shuwa ia ka Arunachal Pradesh bad kumta, dei ban peit ia ka thain shatei lammihngi kum ka Khyrdop rung sha India, kaba long ka kam ba kongsan jong u Myntri Rangbah duh.
U la kren shaphang ka jingkiew ha ka jingmang tyngka sha ka thain naduh u snem 2014-15. U la ong ba la shna jan 40,000 kms ki surok hapoh ka PMGSY, ka jingdon ki kad liengsuin ka la kiew da khyndai sha ka 17 tylli ha ka thain shatei lammihngi bad ka jingthmu kalong ban kyntiew shuh shuh ia ki jingdon jingem.
U Myntri u la ban jur halor ka rukom treikam kaba wanrah jingseisoh. “Peit sha ki jingjop bad ym tang ha ki jingpynlut. Ngin pynthikna ba baroh ki jylla jong ngi ki pynthikna ia ka jingpynshisha ia ki kam da ki paidbah.
Ka hospital kadei ban don ia ki doctor bad ki nurse, ka skul kadei ban don ia ki nonghikai. Ka jingpynshisha ba katno ngut ki nongpang ki la ioh jingsumar, katno ngut ki khynnah pule ki la ioh jinghikai, kata kalong kaba kongsan bha ha ka jingiaid lynti jong ngi sha ka jingiew shaphrang.”
Haba kren shaphang ka jinglong jingman ba iadei bad ka jingshlei um mynta ha kylleng ka thain shatei lammihngi, u Scindia u la pynpaw ka jingsngewlem sha ki longiing kiba la duh noh ia la kiba ieit bathoin jong ngi. “Baroh ki sorkar jylla ki trei shitom, ki shimkhia ia la ki nongshong shnong bad yn ai baroh ki jingiarap ba donkam na ka sorkar pdeng bad ka Tnat DoNER .
