New Delhi, Nohprah 15: U Myntri Sorkar Pdeng ba dei khmih ia ka Tnad Ports, Shipping & Waterways (MoPSW), SarbanandaSonowal u la pyllait ia ka polisi kaba kongsan na ka bynta ka jingkyntiew ia ka jingpynkit mar – ka ‘Jalvahak’ – ka kaba ai jingmyntoi ia ka jingpynkit ia ki mar lyngba ka National Waterways 1 (wah Ganga) kumjuh ruh ka National Waterways 2 (wah Brahmaputra) bad National Waterways 16 (wah Barak)hangne mynta ka sngi.
U Myntri Sorkar Pdeng, SarbanandaSonowal u la pyllait ruh ia ki lieng kit mar – ka – MV AAI, MV HomiBhaba lem bad ka MV Trishul bad artylli ki lieng Ajay &Dikhu – na ka GR Jetty hangne mynta ka sngi. Kane kadei ka jingsdang jong ka jingshakri ki lieng kit mar ba la buh naHaldia na ka bynta ka NW 1 bad ka NW 2.
Ka Sngi kaba long ka dak jong ka jingsdang jong ka jingpynkit mar hapdeng Kolkata – Patna – Varanasi – Patna – Kolkata jong ka NW 1 bad hapdeng Kolkata bad Panduha Guwahati ha ka NW 2 lyngba ka Indo Bangladesh Protocol Route (IBPR).
U Myntri Khynnah jong ka Sorkar Pdeng ba dei khmih ia ka Tnad Ports, Shipping & Waterways, Shantanu Thakur bad u Myntri Khynnah ba dei khmih ia ka Tnad Transport (Independent Charge), Sorkar UP, Daya Shankar Singh ki la iadonlang ha kane ka jingialang.
Ha ka jingai jingkren ha ka jingialang, u Myntri Sorkar Pdeng, Sonowal u la ong, “Hapoh ka jingialam jong u Myntri Rangbah duh, Narendra Modiji, ka sorkar ka la shim ia ki sienjam ban pynurlong ia ka lad ka leit ka wan lyngba ki jaka shong um ban pyndonkam ia ka lad kaba bun kaba don ha ki jaka shong um.
Namar ka jingdunador, ka jing bym ktah ia ka mariang bad ka jingseisoh kum ka lad ka leit ka wan, ngi kwah ban kyntiew ia ka jingpynkit ia ki mar lyngba ki jaka shong um, ban pynduna ka jingkhapngiah ha ki lynti rel bad ki surok. Ka skhim Jalvahakka ai jingmyntoi haba pynkit mar ha ka NW1, NW2 &bad NW16, bad plie lad na ka bynta ka khaii pateng ban peit ia ka kam pynkit mar lyngba ki jaka shong um namar ka jingmyntoi ha ka ioh ka kot.
Shuh shuh, ka jingshakri ba la buh na ka bynta ki lieng kit mar, kaba la sdang na Kolkata, kan pynthikna ka jingpynkit ia ki mar bad pynpoi hapoh ka por ba la buh.
Kane kan wanrah ruh ka jingsngew skhem hapdeng ki nongpyndonkam jong ngi shaphang ka jinglahkhreh ki national waterways na ka bynta ka leit ka wan ki lieng kit mar ha ka rukom kaba duna dor, kaba seisoh bad ka bym ktah ia ka mariang.
Lyngba ka jingpynkupbor ia ki nongpyniaid lieng jong ngi da kane ka skhim bad pynshlur ia ki kam khaii pateng jong ngi da ka jingpynpoi ia ki mar ha ka por ha ka rukom kaba duna dor, kane ka bynrap sha ka thong jong u Myntri Rangbah duh, Narendra Modoji ban wanrah jingkylla lyngba ka leit ka wan haba ka India ka jam shaphrang ban long ka Vikst Bharat.”
Ka lieng ba nyngkong – ka MV Trishullem bad artylli ki lieng Ajay badDikhu– ka kit 1500 ton ka dewbilatna GR Jetty ha Kolkata sha Pandu ha Guwahati lyngba ka Indo Bangladesh Protocol Route (IBPR).Ka lieng kaba ar – ka MV Aai – ka kit 1000 ton ka Gypsum sha Patna katba ka lieng kaba lai – ka MV HomiBhaba – ka kit 200 ton u dewiong sha Varanasi.
Ka skhim ban kyntiew ia ki lieng kit mar ka ai jingmyntoi ia ki trai jong ki mar ba kin pynkit ia ki mar jong ki lyngba ki jaka shong um ha ka jingjngai kaba palat 300 kms. Kane kadei ka sienjam jong ka Inland Waterways Authority of India (IWAI), ka nodal agency kaba kyntiew ia ki lad ka leit ka wan lyngba ki jaka shong um ha ka ri, kumjuh ruh ka Inland & Coastal Shipping Limited (ICSL), ka tnad jong ka Shipping Corporation of India Limited (SCIL).
Ka skhim ‘Jalvahak’ ka pynshlur ban pynduna ia ki jinglut jingsep ha ki kam logistic, ban pynduna ka jingkhapngiah ha ki surok bad ki lynti rel, bad pdiang ia ka lad ka leit ka wan kaba iaineh.
Ka skhim ‘Jalvahak’ ka siew biang haduh 35% ka jinglut baroh ka jinglut jingsep habapynkit ia ki mar lyngba ka NW 1 (wahGanga), NW 2 (wahBrahmaputra) & NW 16 (wahBarak) lyngba ka Indo Bangladesh Protocol (IBP).
Ban pynshlur ia ka kam jong ki nongpyniaid lieng, ka skhim ka pynshlur ia ki trai jong ki mar ban wai ia ki lieng ba long trai lane pyniaid da ki kynhun ym jong ka IWAI lane ICSL.
Ka skhim ka long kaba pakana ka bynta ki kompani lieng ba heh, ki nongpynkit mar, ki kynhun khaii pateng bad ki kynhun kiba peit ia ka jingpynpoi ia ki mar ba heh. Da kaba jiedia kane ka skhim, ka plield ia ki ban kyntiew ia ka kam pynbiang mar ka skhim nyngkong ka treikam haduh 3 snem.
Ka jingsdang ia ka jingpynkit mar ha ki sngi ba la buh ka thmu ban pyni ia ka jinglahkhreh ki lad ka leit ka wan lyngba ki jaka shong um kum kaba iohnong, kaba jemdor bad ka bym ktah ia ka mariang kum kawei pat ka lad ban pynkit mar.
Yn pyntreikam da ka ICSL, la sdang ia ka jingshakri na ka bynta ka NW 1 (Ganga) bad NW 2 (Brahmaputra) bad la buh por na ka bynta ka jingpynkit bad pynpoi ia ki mar.
Ha ka NW 1 hapdeng Kolkata bad Varanasi lyngba Patna, la buh por 7 sngi ban pynkitna Kolkata sha Patna, 5 sngi na Patna sha Varanasi bad 14 sngi na Kolkata sha Varanasi. Kumjuh ruh, na ka bynta ka jingpynkit ia ki mar ha ka NW2 lyngba IBPR, la buh por 18 sngi na Kolkata sha Pandu katba na Pandu sha Kolkata la buh por 15 sngi. Nyngkong, kane ka skhim kan treikam na ka bynta 3 snem.
Shuh shuh, u Myntri Sorkar Pdeng ba dei khmih ia ka Tnad Ports, Shipping & Waterways, SarbanandaSonowal u la ong, “Hapoh ka jingialam jong u Myntri Rangbah duh Narendra Modi, la sdang khyllie im biang ia ka rynsan ki jaka shong um naduh u 2014.
Lyngba ka jingbteng ka jingbei tyngka ha ka jingpynthymmai ia ki lad ka leit ka wan lyngba ki jaka shong um, ngi khmih lynti ba kan don ka jingkylla ha ki kam kiba iadei bad ki jaka shong um namar kine ki skhim ki thmu ban don ka jingkylla ha ka jingpynkit haduh 800 million tonne kilometre lyngba ki jaka shong um lyngba ka jingbei tyngka kaba T. 95.4 klur shuwa u snem 2027.
Kane kalong jan 17% ki mar ba pynkit mynta kaba 4700 million ton ha ki national waterways. Ka skhim kadei ka jingpyrshang ban pynurlong ia ka lad kaba don ha ki jaka shong um bad plie ia ka kane ka lad kaba la shah iehbein tad haduh u snem 2014.”
U SarbanandaSonowal u la bynrap shuh shuh, “Ka jingpynkhie im ia ki National Waterwayska la kyntiew ia ka jingseisoh namar ka jingpynkit mar lyngba jong ka ka la kiew na ka 18.07 Million MT ha u 2013 -14 sha ka 132.89 million MT ha u 2023-24, kaba pyni ka jingkiew kaba palat 700%.
Ngi la buh thong 200 million MT ka jingpynkitia ki mar lyngba ki jaka shong um shuwa u snem 2030. Na ka bynta u snem 2047, da kaba shaniah ba ki lad ka leit ka wan lyngba ki jaka shong um ka long sa kawei ka lad na ka bynta ka jingpynkit ia ki mar, ngi la buh thong 500 million MT, kaba la nohsynniang sha ka jingpynurlong ia ka thong Atmanirbhar Bharat jong u Myntri Rangbah duh.
U Myntri Khynnah jong ka sorkarpdeng ba dei khmih ia ka Tnad Ports, Shipping & Waterways, Shantanu Thakur u la ong, “Kadei ka khyllipmat kaba kyrpang na ka bynta ka jingpynkhie im ia ki lad ka leit ka wan lyngba ki jaka shong um, khamtam ia ka Bengal.
Hapoh ka jingialam jong u Myntri Rangbah duh Narendra Modi, ka la don ka jingkylla ha ki lad ka leit ka wan lyngba ki jaka shong um. Lyngba kine ki skhim, ka kam ba iadei bad ki jaka shong um, khamtam ha ki phangmihngi jong ka India ka lah ban wanrah ia ka jingkylla ha ki kam logistic.
Kane ka lad ka leit ka wan kaba jemdor, kaba seisoh bad ka bym ktah ia ka mariang ka dei ka lad kaba biang bha na ka bynta ka leit ka wan jong ki briew bad ka jingpynkit ia ki mar.
U Myntri Khynnah ba dei khmih ia ka Tnad Transportation (Independent Charge), Sorkar UP, Daya Shankar Singh, u la ong, “Ki lad ka leit ka wan lyngba ki jaka shong um ki la plie ka por ba thymmai jong ka jingkylla ha ka ioh ka kot hapoh ka jingialam jong u Myntri Rangbah duh Modi.
Kane ka sienjam ka wanrah sa kawei ka lad na ka jingpynkit mar bad ka lad na ka bynta ka leit ka wan ki briew,hynrei ka kyntiew ruh ia ka jingim jong ki briew kiba sah harud ka wah Ganga, ka kyntiew ia ka jingseisoh bad ka lad jingpyniasoh ki bym pat ju don.”
Ha kane ka jingialang la iadonlang ruh u TK Ramachandran, Secretary, MoPSW; Vijay Kumar, IAS, Chairman, Inland Waterways Authority of India (IWAI), Capt BK Tyagi, Chairman & Managing Director, Shipping Corporation of India (SCI), Rathendra Raman, Chairman, Syama Prasad Mookerjee Port bad kiwei kiwei.
Ka India ka don ki jaka shong um ba kynthup ia ki wah, ki wahduid, ki jaka lang um bad ki wah rit. Na ki20,236 km ba lah ban pyndonkam na ka bynta ka leit ka wan, 17,980 km ka kynthup ia ki wah, bad 2,256 kmka dei lyngba ki wahrit kiba lah ban pyniaid ia ki lieng.
Hynrei, ka jingpynkit mar lyngba ki jaka shong um ka dang duna haba ianujr bad ki ri kum ka United States, China, bad kito ha ka European Union. Lyngba ka jingphaikhmat sha ka roi ka par, ki lad ka leit ka wan lyng ki jaka shong um ka India ki lah ban long u budlum jong ka ri kiba plie lad ia ka leit ka wan kaba seisoh bha.
