Mairang, Jymmang 11: U Sub-Divisional Magistrate ka Mairang Civil Sub-Division, Mairang ha ki ar tylli ki hukum bala pynmih mynta ka janmied u la pyntip ba na ka daw jong ka jingsaphriang stet jong ka khlam COVID-19 ha ka Shnong Mairang Mission bad ka Shnong Umthied Bynther.
U SDO ka Mairang Civil Sub Division, la pynbna ia kitei ki ar shnong kum ki Containment Area kum shi bynta ban tehlakam ia ka jingsaphriang jong u khniang jingpang COVID-19.
Katkum kine ki hukum, yn ym shah iano iano ruh ban rung ha kitei ki Containment Area lait noh ki nongtrei jong ka tnat ka koit ka khiah bad kito kiba la ioh jingbit na ki Incident Commander ba dei peit ia kine ki shnong bad baroh ki nongshongshnong ki dei ban shong khop ha la iing.
La bthah ruh ba ki dei ruh ban deng mask tikna, kim dei ban iakhleh bad kiwei pat bad ki dei ban sngapthuh bha lada ki don kano kano ka jingsngewshitmet ne jyrhoh ne dap shadem bad jynjar ban ring ne pynhiar mynsiem.
Shuhshuh, baroh ki dukan kiba don ha kitei ki ar shnong kin khang lut bad ki ophis ruh kin khang lut lait noh ka Mairang Police Station, Mairang.
Kino kino kiba pynkhein ia kitei ki hukum kin shah pynshitom katkum ki kyndon ain jong ka Disaster Management Act, 2005 bad ka IPC.
Lah ban kdew hangne ba haduh mynta ka sngi la don haduh 9 ngut kiba ioh ia u khniang jingpang COVID-19 ha Mairang Mission bad 12 ngut ha Umthied Bynther.
