Shillong, Jymmang 9: Kat kum ka jingbthah jong ka Sorkar kaba la pynmih ha ka sngi Saitjain khnang ba ki paidbah nongshong shnong kin ioh ban thied ban pet ia ki jingdonkam ba man la ka sngi ha ka por ban pynjari ia ka kurphiw 10 haduh 17 tarik, Jymmang 2021 hapoh East Khasi Hills District.
Katkum ka jingpynbna na ophis jong ka Deputy Commissioner la pyntip ba, tang ki dukan kiba die ia ki marbam mardih bad ia ki tiar ba donkam eh kiba la jingpynbeit da ki Incident Commander jong man la ki Zone kiba don hapoh Sor Shillong bad ki jaka ba marjan, kin lah ban plie naduh sngi nyngkong haduh sngi thohdieng, naduh ka por 9 baje mynstep haduh 7 baje janmiet, , khnang ba ki paidbah nongshong shnong kin lah ban thied ban pet ia ki mar ba donkam eh.
Baroh ki shnong ki dong kila jied ia ki dukan ha la ki jong ki jong ki shnong bad dong, bad ki bor shnong bad CCMT kin pyntikna ba ki paidbah nongshong shnong kim dei ban mih shabar na la ki jong ki shnong bad dong na ka bynta ban thied ia ki mar ba donkam ban lait na ka jingkhapngiah ne jingsaphriang shuhshuh jong u khniang jingpang.
Na ka bynta ki shnong kiba don ha ki thain nongkyndong jong ka District, ia kane kajuh ka jingpynbeit yn sa pyntreikam da ki Sub-Divisional Officer (Civil)/Block Development Officer bad incident Commander ha ryngkat ka jingiatreilang bad ki Rangbah Shnong bad ki CCMT.
Ki Rangbah Shnong, CCMT bad ki kynhun ba peit ia ka bha ka miat hapoh shnong poh thaw, kin pynbeit ia ka jingtreikam jong ki dukan ha la ki jong ki jong ki shnong ki dong bad ruh ban pyntikna ba ki paidbah nongshong shnong kin bud ryntih ia ki jingbthah ba la pynmih da ka tnat ka Koit ka Khiah.
Ki paidbah ki dei ban bud pyrkhing ia kine ki kyndon harum haba ki leit thied leit pet, Ban deng barabor ia ki mask, Ban pyniajngai iwei na iwei pat ym duna ia ka 1 mitar, Ban ym ia lum bun briew tang ha kawei ka jaka bad dukan bad ruh ban ym pynjlan por palat hapoh dukan. Ban iatrei lang bad ki jingpyniaid jong ki Rangbah Shnong bad CCMT bad jong ki Incident Commander.
Na ka bynta ka jingpynpoi ia ki jhur, lah ban ia pynbeit bad ka NARI/1917iTEAMS bad kiwei pat ki nongpynbiang mar ba la ithuh.
Lada don da kiwei pat ki rukom pynbeit hapoh shnong ki dong, dei ban pyntip sha ki Incident Commander khnang ban lait na kino kino ki jingbym ia sngewthuh jingmut bad ia ki Car Pass yn ai hi da ki Incident Commander ha la ki jong ki jong ki Zone.
La ai hukum ia ki BDO ban pynkhie im ia ki iew na ka bynta ki mar rep ha man la ki Block bad ha ki jaka ba ia khap bad ka sor Shillong, ha ryngkat ka jingiatrei lang bad ka Tnat ka Rep ka Riang, ki nongpynmih mar rep bad ki Rangbah Shnong, khnang ban lah ban pynbiang ia ki jingdon kam ha la ki jong ki dong bad ba ki nongrep kin lah ban die ia ki mar rep jong ki bad ruh ban kiar na ka jingiarung ia mih hapoh Sor Shillong ha ki sngi bad ki taiew ki ban bud.
Ia ki mar bam mar dih ym don jingduna eiei bad kane ka Ophis ka la peitngor bha halor kane ka bynta.Ki dukan ba die ia ki mar bam mar dih kin bteng ban plie kumba la ju pynbeit na ka por sha ka por, te ki paidbah kim dei ban tieng ne mih shisien mih ha ki por ba plie.
