Shillong, nailur 14: Ka Kong Alithia Kynta kawei na ki dkhot jong ka “Opus Production” mynta ka sngi kala pynbna ba ia ka “Shillong Autumn Festival 2019” kan long ha u bnai Risaw u ban wan ha Orchid Lake ha Umiam, ia kane ka jingpynbna la don lang ruh u Bah Andreas War bad u bah Meban Warjri kiba dei lang jong ka Opus Production.
Haba kren ha ki lad pathai khubor mynta ka sngi ha Shillong Press Club, la iathuh ba kane ka jinglehkmen synrai kan long ar sngi ha ka 26 bad 27 tarik jong u bnai Risaw ban wan, la pynbna ruh ka bairung kan long T.500/- tyngka marwei bad ia ki khynnah kiba hapoh 12 snem kan nym don jingsiew ei ei.
Ha kane ka jingleh kmen kaba ar sngi kin don shibun ki jingialehkai bad ka tem ka pud da ki kynhun tem kiba paw bad kum juh yn ailad ruh ia kito ki kynhun tem kiba dang ialeh ban pynpaw pyrthei ia ka sap jong ki bad kane kan long ka kabu.
Ka kong Alithia kala ong ruh, kumba ki la leh ha u snem ba la dep ban nym shah ia ki pla plastik ban rah hapoh ka jaka ban pynlong ia ka Tamasa synrai ha orchid Lake, mynta ka kynti ruh kin nym shah ban rah ia ki kynja plastik.
La iathuh ba ha u snem ba la dep ka Meghalaya Tourism Development Corporation (MTDC) kala shim ia ka bai wai jaka T.2.00 lak tyngka, hynrei kaba sngewtynnad mynta ka long ba kin nym shim dor ei ei shuh bad kin long lang kawei na ki kynhun ban ia don bynta ha kane ka lehkmen synrai.
