Shillong, Iaiong 28: U Symbut Myntri Rangbah ka jylla u bah Prestone Tynsong u la iathuh ba ha ka jingialang kaba la long mynta ka sngi kaba la pyniaid da u myntri rangbah ka jylla u Conrad K Sangma, kala shim ia ka rai ban pynbna ia ka Shillong, Jowai bad Tura kum ki ‘Contianment Area’ na ka bynta shiphew sngi lynter.
Haba kren ha ki lat pathai khubor u bah Prestone u la ong ba kane ka jingpynbna kan trei kam naduh ka por 5.00 baje mynstep jong ka 1/05/2021 haduh ka por 5.00 baje mynstep ha ka 10/05/2021, kane ka Contianment area kan trei kam ha kitei ki lai tylli ki jaka.
Ka sorkar kala shim ia kane ka rai ka long ha dien ba la iathir sani bha bad ha dien ba la shim ia ka kaiphot na baroh ki Deputy Commissioner jong ki District, na ka liang jong ka sorkar kam ban se shuh ban pynbna ‘Containment Area’ ia kitei ki lai tylli ki jaka sor kiba heh ha ka jylla.
Ha kane ka por ba don kane ka containment area ha kitei ki lai tylli ki jaka, ka sorkar kala pynbna ban nym shah ia ki jingialang, jingialang seng sain pyrthei, ki jingialum paidbah, ki jingiaseng bad kiwei kiwei kin nym shah ha kitei ki tarik bala pynbna kum ka containment area naduh 1/05/2021 haduh ka 10/5/2021.
Ka sorkar kala khang ruh ia baroh ki jait jingialehkai sport, ki jaka ai jinghikai kin khang baroh, baroh ki ophis jong ki riew shimet kin khang, lait noh kito ki ophis jong ki riew shimet kiba dei ha ka liang ki marbam mardih bad kiba don ka jingiadei bad ki paidbah. Ki ophis jong ka sorkar pdeng ki bym don jingiadei bad ki paidbah kin khang bad ki lah ban trei na ki iing ki sem ha kitei ki sngi ha ki jaka ba la pynbna containment area.
Haba ia dei bad ka iaid ka ieng naduh naduh ka 1/05/2021 haduh ka 10/5/2021, hap ban bud pyrkhing ia kane khnang ba kan nym wanrah ia ka jingma ha ka iing ka sem, ha ka shnong ka thaw bad kum juh ha ka jylla baroh kawei.
Haba ia dei bad ki kali kamai, kiba kit briew la pynhiar ia ka rukom kit sha ka 1/4 kaba mut shipawa, ka jingshah ia kine ki kali paidbah ba kin iaid ruh kin shah tang kiba ia dei bad ki lad jingsumar bad na ka bynta kito ki ban leit ai Tika, na ka bynta ki khynnah skul, ki nonghikai kiba hap ban leit ban thoh ia ka eksamin bad kiba don jingiade bad ki kam eksamin tang ba hap ban ioh ia ka jingbit na ki DC.
Haba ia dei bad ka leit ka wan na kawei ka District sha kawei pat ka District, na Shillong lane ki ban wan sha Shillong, lane Tura lane Jowai ban leit sha kiwei kiwei ki District ruh ba kin nym ia iaid iaieng kumba long mynshuwa lat noh kiba don ia ki kam kyrkih hynrei ki hap ban ioh ia ki jingbit na ki DC.
U bah Prestone u la ong ba ka sorkar ka sngewthuh ba kane kan don ka jingktah ia ki paidbah kiba im ja kpoh man ka sngi te hynrei ki sngewsih ban hap ban shim ia kane ka rai namar ba ka jingkoit ka jingkhiah ka dei ka kam kaba ha khmat eh jong ka sorkar ban ai jingiada ia ki paidbah.
Ki kam kiba ka sorkar kala rai ban shah ha ki sngi ba don ka jingpynbna containment, naduh ka 1/05/2021 haduh ka 10/5/2021, ki dukan die ia ki marbam la shah ban plie tang ba kin hap hapoh ki jingpynbeit ia ki sngi bad ka por ia kane ka bynta la aiti sha ki DC ba kin pynbeit.
Haba ia dei bad ki jingtrei kiba ia dei bad ka jingtei la shah ban pyntrei kynthup ia ki dukan kiba die ia ki mar shna iing, ki dukan die tiar light, ki dukan shna mobile, ki karkhana shna kali kine ruh ki hap hapoh ka jingpynbeit ia ki sngi bad ka por kaba ki DC kin sa buh.
Ki bank, kkwei ki kam ba don jingiadei bad ki kam ban, ka Post ophis bad ka lad phah jingtip kiba ia dei bad ki kam ai jingtip bala tip kum ka ‘telecommunication’ ia kine ruh la shah ba kin trei kam ha kitei ki jaka ba pynbna ia ka containment area, ki ophis jong ka sorkar kiba don ka jingiadei na ka bynta ki paidbah kine ruh kin plie.
Ia ki breiw yn shah ba kin iaid kin ieng kan long tang ia kito ki briew kiba don kam ban leit sha ki jaka ai jingsumar bad ban aiti tika, ban leit rep bad kiba ri jingri bad kiba kit ia ki marbam mardih, la shah ruh ia ki kali ban iaid kiba kit ia ki mar khaii pateng kiba don jingiadei ba d ki marbam.
