Shillong, Nohprah 20: Mynta ka sngi ka party HSPDP kala pynbna ia ki kyrtong kiban ia khun ia ka MDC elekshon sha ka iing dorbar jong ka KHADC bad JHADC ban long ha ka 21/Rymphang/2025.
Ki kyrtong kiba la pynbna mynta ka sngi ki long phra ngut, 6 ngut sha ka iing dorbar jong ka KHADC, u bah K P Pangniang na Rambrai –Jyrngam ba dei ruh u president ka party, bah Jubanlang Kharbihkhiew na Mawkhar-Pynthorumkrah, bah Lurshai Lyngwa na Jaiaw-Mawprem.
Bah Stodingstar Thabah na Nongspung-Sohiong, bah Polanding Sohphoh na Mawkyrwat, Kong Badariti Lyngdoh Nnglait na Nongstoin kaba dei ruh ka pyrsa jong u bah HS Lyngdoh bamkwai ha dwar ublei.
Ki kyrtong kiba la pynbna mynta ka sngi ki ban ia khun ia ka MDC elekshon sha JHADC ki long u bah Neh Langki Pala na Sutnga Nongkhlieh bad u bah Wanshwa Nongtdu na Narpuh u ba dei ruh u president ka party ha Jiantia Hills District.
Ha ka jingkren jong u Presdient u bah KP Pangniang u la pynkynmaw ia ka jingtrei kiba ka party kala leh na ka bynta ka jylla bad dei tang kane ka party kaba la neh khlem kylla naduh na ioh ia ka jylla haduh mynta.
Ha kane sngi la ioh ruh ia ka jingkren na u MLA bah Methodius Dkhar ha kaba u la pynshai ia ka jingleit ban ia treilang bad ka sorkar, bad la ai khublei ia baroh ki kyrtong kiba la don ha kane ka sngi ba kin poi sha ka jingjop.
