Shillong, Risaw 17: Mynta ka sngi u Lat ka jylla u Phagu Chauhan u la pyniaid ia ka jingialang kaba 31 kaba juh long shisien shisnem jong ki shipai bala shongthait ia kaba la pynlong ha Raj Bahvan Shillong kaba dei peit lyngba ka kommitee kaba kyrpang jong ka jylla na ka bynta ka jingbit jingbiang jong ki.
Ka jingthmu jong kane ka jingialang ka long ban ia kren ia ki jingdon kam jong ki shipai kiba la shongthait kiba dei na ka kynhun shipai khyndew, shipai suin bad shipai duriaw ha kaba ia dei bad ka jingmyntoi ka bai bam tynmen ka jong ki, ki lat jingsumar bad ki jingiarap kiba dei na ka sorkar pdeng bad sorkar jylla khamtam ia ki riew kynthie bad ki nongioh pateng.
Ha kane jingialang la ia kren ba la don kam ban pynbun ia ka jingmang pisa bad ka Sainik Welfare Board bad ban pynbha ia ka jingtrei kam jong ka da kaba pynbit ba kin long kiba bit katkum kane ka juk kaba mynta bad ban pynkiew ia ka jingiarap sha ka seng ki shipai bala shongthiat.
Ha kane ka jingialang u Lat ka jylla u la ai ka jingkular ban ai ka jingkyrshan bad u pyrshang ban pynbha ia ka jingdon kam jong ki shipai kiba la shongthait bad ia ki nongioh pateng kiba don ha kane ka jylla Meghalaya.
