Shillong, Nohprah 01: Ka tnad pule puthi ka sorkar pdeng mynta ka sngi kala pynmih ia ka 29/Naiwieng/2024 kala pynmih ia ka jingpyntip ba la pynjlan shuh sa 15 sngi ia ka kynhun tohkit ba arngut ban tohkit ia ki jingiakhih hapoh ka skul bah NEHU.
Katkum ki thymmei khubor kiba la ioh, u D K Himanshu Under Secretary ka tnad pule puthi ka sorkar pdeng, la phah ia ka shithi sha u Prof. D.P Singh shongknor ba khlieh ia ka kynhun tohkit ia ka NEHU, ba duba dei ruh u shongknor ba rom ka UGC.
Ka tnad pule ka sorkar pdeng haka 14/11/2024 kala thung ia ka kynhun tohkit kaba arngut ban tohkit ia ki jingjia hapoh ka skul bah NEHU kaba la mih ka huri hura, ia kaba la ai por 15 sngi ban pyndep ia ka jingtohkit.
Ka kynhun tohkit ha dien bala kut noh ka 15 sngi kumba la buh por, hynrei khlem pat lah ban pyndep ia ka jingtohkit, kum na shongknor ka kommittee la pan bor biang na ka tnad pule ban pynjlan ia kaba ka tnad pule kala pdiang bad la ai por shuh sa 15 sngi ban dang iai bteng shuh ia ka jingtohkit.
Ka tnad pule kala thung ia ka kynhun tohkit kabala khlieh da u Pro. D P Singh shongknor barim ka UGC ban long u shongknor kane ka kynhuntohkit bad u wei pat u dkhot kane ka kommittee u Prof. Dilip Chandra Nath u Vice Chancellor barim ka Assam University.
