Maligaon, Nailar 13: Ka North East Railway kala pynjur ia ka jingpahara hapoh jong ka Guwahati Railway station shuwa ki sngi rakhe ia ka Independence Day. Kane ka jaka sangeh rail ka dei kaba heh duh na North East ha kaba ki nongleit nongwan ki long palat ia ka 40000 ngut man ka sngi bad ki rail kiba iaid lyngba ia kane ki long palat ia ka 30 tylli man ka sngi.
Na ka liang jong ka N.F Railway ka shim ban ai ia ki lad jingiada ha kane ka station rel ka long kaba don kam haduh katta kata. Ban pahara bha ia kane ka station rel la pyndon kam 13 ngut ki pulit RPSF kiba la biang bha ryngkat ki tiarki tar nalor kine la don ruh 26 ngut ki RPF, 30 ngut ki BRP bad 10 ngut ki CRPF ban pahara ia kane ka jaka.
Ban dang pynkhlain shuh shuh ia ka jingpahara la buh ruh ia ki kynhun pulit ha ki jaka ba dang idon kam ban buh ia ki kynhun pulit, la buh iaki jaka rung bad jaka mih la ka jong ka jong ban lah ban pyniaid ia ki paidbah kiba rung bamih ha kane ka station rel.
Iaki jaka kiba kham ia rung ia mih paidbah la buh ia ki khyrdop nar bad la pyndon kam ruh ia ki ksew ban pynsma bad ia ki kor ki bor kiba lah ban kdew ba don ki tiar pynmynsaw nalor kine la pynrei kam ruh ia ki CCTV kamera ha baroh ki bynta jong kane ka station rel.
Nalor kane la bethah ruh ban peit bniah ia ki jaka bret niut, ki jaka buh ia kip la ki pdok, ki jaka ba buh ia ki mar kiba wan bad la bethah ruh ia baroh ki nongdie jingdie ki daju ba kin pyntip lada ia don kino kino ki briew kiba iaid pher ha kane ka jaka.
