Shillong, Nailar 22: Ka Citizens Foundation for Human Development (CFHD) ha ryngkat da ka jingiatreilang bad ka All Meghalaya Muster Roll Workers Union (AMMRWU) ka la ioh ban pynlong ia ka jingialang hapoh Mawthadraishan Block ha kaba bun ngut na ki Muster Roll ki ASHA bad ki Anganwadi ki la wan ban iashim bynta bad ia don ryngkat lang ban iakren ia ki jingeh kiba kum ki nongtrei ki iakynduh bad shah tynjuh na kapor sha kapor ha ki bor Sorkar.
Katei ka jingialang la pynlong ha ka sngi baar hapoh ka Indoor Stadium jong ka Shnong Kynshi. Ka jingthmu kaba kongsan ba la pynlong ia katei ka jingialang ka long ka bynta ha ka ban iarap ia ka jingeh kaba kum ki nongtrei sha kitei ki thaiñ ki iakynduh na kapor sha kapor kumjuh ruh ban buddien bad pynsngew sha ki bor kiba halor jong ka Sorkar ia ki jingdawa kiba dang sahteng kaba kum ki nongtrei ki iakynduh.
Ka CFHD kan shim ia ki lad ki lynti ban wad ia ki kam kiba dang sahteng kiba kat haduh kine ki sngi kiba mynta ym shymn la lah ban pyntreikam na ki bor Sorkar wat hadien ba la dep ban pynsngew ia kiba bun ki bynta kaba kum ki nongtrei ki ju iakynduh.
Kaba bynta kaba kham kongsan ha kaba kane ka jingialang ka la ioh ka long ka jingpynkha shi syndon ia ka tnat treikam jong ki Muster Roll da kaba la tip kum ka Mawthadraishan Block Muster Roll Workers Union bad la ioh ia ki nongkitkam naduh u President, Secretary bad kiwei kiwei ruh kumjuh. Katei ka Unit kan hap hapoh ka jing khmih jingpeit jong ka All Meghalaya Muster Roll Workers Union (AMMRWU) bad ruh kan hap ban pyntip shapoh ka Seng Kmie haba don kino kino ki jingjia kiba ki iakynduh hapoh ka Block jong ki.
La iohsngew ia ki jingkren napoh ka Citizens Foundation for Human Development (CFHD) lyngba u Bah Banshai Marbaniang, uba dei u President kumjuh ruh lem bad u Bah A. B. Nongbet, General Secretary jong ka Seng. La ioh ia ka jingkren na u Bah R. Thabah uab dei u President jong ka All Meghalaya Muster Roll Workers Union ha kaba laioh ban iatai sani bad iakren na ka bynta ki kam kiba kongsan ha kaba iadei bad ki nongtrei bapher bapher.
Na kaliang jong ki ASHA bad Anganwadi kila pynpaw ia ki jingeh kiba ki iakynduh hapoh ki shnong kaba ki don khamtam ha kaba iadei bad ki khynnah kaba kim treh wat ban bam ruh ia ki jingbam kiba nakaliang jong ka Sorkar ka la mang kyrpang na bynta jong ki namar ba kim iahap bad ka met ne wat bad ka jaka kaba ki don ruh kumjuh.
Watla bunsien ki ASHA ne Anganwadi kila ju pynsngew sha ki bor ba halor ia ka jingeh kaba ki ju iakynduh pynban long lehnohei namar ymdon ba sngap wat tang khyndiat dei na kane ka daw kaba la pynkylla long ia ki paidbah nongshong shnong ba kin iakynduh ia kiba bun ki jingjia kiba pher bapher.
