Shillong, Warjri 23: Ka long ka ba donkam ban sot na ki ktien shnong na kylleng ki thaiñ bad kyntoit shnong khnang ban pynriewspah ia ka ktien Khasi bad ban kdup shitylli ia baroh ki ktien ha kawei ka ktien pdeng.
Nalor kita ki ktien ba la don lypa na ki kylleng ki kyntoit shnong ki don ruh ki ktien ba lah ban shna thymmai da ka ba synrop lang ar ne lai kyntien ban shna kawei ka ktien ka ba kit jingmut, ka ba thiang snah bad ka ba lyngkot katlah katiai khnang ban bit ban biang ka thoh ka tar. Kine harum la jer kum kat kum ba la pyrshang ban pynwandur ha ka ba dang dei ban tuklar da ka iktiar ba pura halor ka ktien:
Rehabilitation: ka mut pynkhïah pat- pynkhiah ka dei ba sumar ban koit na ba pang; pat ka dei sa shisien.
Release– ka mut pyllait- pyllait ka dei ba shah ban paw ne mih pyrthei na ka ba set ne rieh.
Restaurant: ka mut basabam basadih- basa ka dei ka trep ne їing rieh tngen shipor; bam ka dei ka mar tylli ba la shet ih ban pynkdang; dih ka dei ka mar um ne kynja um ba dih pyntngen.
Responsible: ka mut kitkhia, kitkhlieh- kit ka dei ba rah tynjuh ha la met ne tyrpeng; khia ka dei ka ba jubor jingthew ban rah ne tynjuh; khlieh ka dei ka janor pyrkhat, tangba kitkhlieh ka dei ba shimti ban bah khala їa kano kano ka kam.
Research: ka mut tihsani– tih ka dei ba puh jylliew; sani ka dei ba bniah.
Research Scholar: ka mut stadtihsani- stad ka dei ba shemphang; tih ka dei ba puh jylliew; sani ka dei ba bniah. Kumta ka thew їa u Riewstad tihsani ka ba mut Research Scholar.
Resource: ka mut tyllonglum, tyllong ka dei ka tynrai ba mih; lum ka dei ba kynshew.
Response: ka mut shahshkor, aijubab- shahshkor ka dei ba pynsngap dngong; ai ka dei ba sam shawei; jubab ka dei ka ktien ba ong katkum ba kylli.
Result: ka mut mihjubab- mih ka dei ba sei shabar sha ba paw; jubab ka dei ka ktien ba ong kum ba khmihlynti.
Review: ka mut pyrman– pyrman ka mut ba peitngor bniah.
Revolve: ka mut rwin- rwin ka mut ba shad pyllun ha jylli.
Rhythm: ka mut khriang– ka dei ba їahap tar ka sur ba kynud, rwai ne tem.
Role Model: ka mut lur nongmuna- lur ka dei ka ktien lyngkot jong u khlur; nongmuna dei ka nuksa ba paw shynna.
Ruins: ka mut lympher- lympher ka dei ka nongrim ba la twa bad saphriang sawdong.
Rust: ka mut sarang- sarang ka dei ba pyut na sla jong ka nar ba mih ki tngit ne phngit eitnar.
Sacrifice: ka mut pha, lenlade– pha ka dei ba aiti la jingim na ka bynt kiwei; len ka dei ba kyndiah ne kyrngah ban їoh їa kaei kaei; lade ka dei ha la shimet.
Satellite: ka mut metsuiñ– met ka dei ka bynta ba tylli bad kongsan ha ka dur ka dar jinglong jingman jong kano kano ka jingthaw; suiñ ka dei ka sahit ne ka bynta ba hapdeng ka bneng bad ka ryngkew.
Save: ka mut kynshew, buhti, tyngkai– kynshew ka dei ba lum lang hajuh ban buh bha; buhti dei ba mang lypa dano dano ban їoh pateng mano re mano; tyngkai dei ba buh khop ha ba rieh ban ym jah.
Scene: ka mut jiaiohi- jia ka dei kaei kaei ka ba long na ka daw jong kano kano ka jingїatyngkhuh jong ki jingthaw; їohi ka dei ka ba paw ha khmat.
Scale: ka mut diengkot– dieng dei u lynter metbah ba mih ha khyndew; kot dei ka kynjang na tduh sha tduh. Kumta diengkot dei u lynter dieng ba shim jingthew na tduh sha tduh jong u dieng kat kumba lah mang.
Scam: ka mut klip klop- klip klop lane tang klop ka dei ba pyndonkam bymdei їa ka mang tyngka pisa na ka bhah jong kawei ka bynta sha kawei pat ka ba don ka lad ban їoh kabu ha lade.
Schedule: ka mut kyrnit- kyrnit ka dei ka kawei na ki syrtap buh bynta na ka bynta kano kano ka jingmut ha ka dulir.
Scheme: ka mut kam pynroi– kam ka dei ka jingtrei ban pynlong kumba thmu ban sule ha lade shimet, ha ka imlang sahlang bad ka longbriew manbriew; pynroi ka dei ban nang san bad pahuh ha kano kano ka jingdon jingem jong ki briew shimet ne ha ka imlang sah lang ka longbriew manbriew.
Scholar : ka mut stadtihsani– stad ka dei ba shemphang; tih ka dei ba puh bad ngam jylliew; sani ka dei ba bniah thik pa thik.
Scratch: ka mut pruid- pruid ka dei ba khlong pynmong da ki tiar ba nep.
Seal: ka mut laha- laha dei ka kynja bthing ba set ne khang їa kaei kaei.
Seek: ka mut ïit, tba- ïit ka dei ba wad da ka ba peit artat, tba ka dei ba wad da ka ba tare ruma kum haba dum.
Seize: ka mut kurup, knieh- kurup ka dei ba shim jubor da ka iktiar na shimet ne ki paidbah; knieh ka dei ba shim jynthet na kiwei.
Senses: ka mut bortipthuh– bor dei ka jingkhlaiñ bad jinglah ka bormet bor pyrkhat ban trei ne ban kit; tipthuh ka dei ba sngew ha lade їa kaei ka ba jia kumba ka dei ban long.
Sensitive: ka mut ktahnud- ktah ka mut ba bat pynsngew ha lade; nud ka dei ka ‘tien lyngkot jong u dohnud. Kumta ktahnud ka dei ba don ka jingsngew ka ba shim khia ha la dohnud.
