Shillong, Iaiong 01: Dang shen,ka sorkar MDA-II ha Meghalaya hapoh ka jingialam jong ka party NPP ka la rai(lyngba ka Cabinet Meeting) ban pynkiew noh ia ka shuti Casual Leave(CL) na ka 15 sngi sha ka 30 sngi ha ka shi snem na ka bynta ki nongtrei sorkar bad ki public service undertaking(PSU) kiba treikam hapoh ka sorkar jylla.
Ha ki por kiba la dep,ka sorkar ka ai bad shah ban shim shuti ( CL) tang hapoh 15 sngi ha ka shi snem ia kino kino ki nongtrei ba la siew tulop da ka sorkar. Lada ki shim palat nangta, kin hap ban leh da kiwei pat ki jait shuti katkum ka jingia pynbeit bad jingia sngewthuh jingmut lang bad ki Head jong kito ki Department ba ki trei ne ki Head jong ki institution.
Katei ka shuti (CL) ka treikam lang kumjuh solonsar(uniform applicable) wat ia ki nonghikai skul kiba hap hapoh ki deficit system. Ha kine ki shiphew snem tam mynta,kata,hadien ba la pyntreikam ia ka 5th Meghalaya Pay Commission,ka sorkar Meghalaya ka la pynkiew ia ka shuti iohkhun(maternity leave) ia ki longkmie na ka 3 bnai sha ka 6 bnai.
Wat ia ki longkpa(paternity leave) ruh ki ioh shuti lem haduh 15 sngi ei ei ha ka por ba kha khun ka kmie khun jongki.Hynrei,kaba lyngngoh pat kalong ba,katei ka shuti kam treikam satia(not applicable) ia ki nonghikai skul hapoh ka deficit system.
Ka Office Memorandum jong ka sorkar Meghalaya ka la thoh shai ba katei ka Office Memorandum jong ka sorkar Meghalaya kam treikam(exemtion) ia ki nonghikai kiba hikai ha ki skul deficit wat la ka Service Rule(2018) jong ki nonghikai ba ioh jingsiew na ka sorkar(Govt.aided schools) ki la thoh ban ioh lang kumjuh ia ki nonghikai ba la siew tulop lang ka sorkar.
Kane ka long kum ka jingleh shiliang khmat(partiality) bad jing ibein ne jingleh bein (discrimination) na ka liang ka sorkar ia ki nonghikai hapoh ka deficit system.Tip kane ka CL ba 30 sngi ba ka sorkar ka la rai mynta kan treikam(applicable) ne em ia ki nonghikai kiba hap hapoh deficit skul.
Ka official notification jong ka sorkar ka dei ban thoh shai dar ba ka kynthup lang (including) ia ki deficit skul,lym kumta,ki bor pyniaid skul kin artatien ban pyntreikam ia katei ka rai.
Katei ka rai jong ka sorkar ka kren shai tang ia ki nongtrei kiba kwah shim shuti kin ioh shuti pahuh ei haduh 30 sngi ha ka shi snem.Hynrei,ia kito pat kiba minot thop ban leit trei khlem shim shuti, kumno ka sorkar kan pyrkhat halor jongki? Ha ka jingshisha,lada ki nongtrei kin wan tista khlem pep sha ki kam ba ki trei.
Ka dei ruh ban ai jingiaroh,ai mynsiem, ai prize ne ai award kum ka jingpynshlur khnang ba kan long ruh ka nongmuna ia kiwei ki nongtrei.Ka sorkar ka dei ban pyrkhat ruh ia ki riew minot ba wan tista sha ka kam jongki,namar lada ki wan tista,kan long ruh ka jingmyntoi ym tang ia kato ka office ba ki trei, hynrei ia ka roi ka por jong ka state bad ka ri hi baroh kawei.
