Shillong, Jylliew 26: Ka shnong Umsaitsning pyllun, Ri-Bhoi district, ka la pynmih ia saw ngut ki samla kiba hapdeng 12 haduh 26 snem na ka shnong Umsaitsning Pyllun, ban leit mihkhmat na ka jylla ha kawei ka jait jingialehkai iakura kaba la tip kum ka UMAI National Muaythai champion, 2022, bad lai ngut napdeng jong ki, ki la wanrah ia ka nam ka burom la ka iing ka sem bad ka shnong ka thaw bad ha jylla baroh kawei.
Kitei ki saw ngut ki samla kata ar ki kynthei bad ar ki shynrang ki la ioh khur ia ar ki takma ksiar kum ki nongjop pyrshah ia kiwei pat ki nongiakhun na kiwei ki jylla bad kawei ka takma rupa, katba uwei um shym la lah satia ban rah ia ka thong.
Katei ka lympung iakura (UMAI National Muaythai champion) ka dei kaba la pynlong ha Shrimant Tukoji Rao Pawar, Indoor Stadium, Dewas, ka jylla Madhya Pradesh kaba la sdang naduh ka 18 tarik Jylliew bad kaba la kut noh ha ka 22 tarik Jylliew.
Kiba la jop bad rah ia ka takma ksiar ki long ka Alphonsa Zinia Wriang, 36 Kilo 12 snem bad Mary Christine Wriang, 38 Kilo 15 snem, bud sa u Jubinian Mylliemngap, 51 Kilo 26 snem uba ioh rah ia ka takma rupa bad u Allandonald Kharthangmaw, 49 kilo 19 snem watla um shym la poi sha ka thong.
La pdiang burom ia ki hadien ba ki la wanphai da ka Umsaitsning Sports & Cultural Club ha iing dorbar Lad Mawrong ha ka janmiet jong ka 25 tarik Jylliew bad la pynkup burom ruh ia baroh saw ngut ha ka jingialang kaba rit bad kaba shongkun kum ka jingai mynsiem.
Kitei kiba la jop kin hap ban shim bynta biang sa ha ka jingiakhun ha ka lympung ki ri ka pyrthei (international level) ban long noh shen ha u Nailar, 2022, kata sa tang ar bnai mynta ka ban long ha Malaysia.
Kitei ki samla iakhun ia katei ka jinglehkai Muaythai ki la iathuh ruh ba ka don ka jingiapher hapdeng ki rukom pyniaid shabar jylla haba nujor bad ka rukom pyniaid hangne ha jylla lajong.
Kum ki ban sa leit mihkhmat pat sha ka international level, ki la pynpaw pat ia ki jingeh ba naei kin ioh jingkyrshan lymda ki bor sorkar lyngba ka tnat ki kam lehkai kim kyrshan ia ki, bad ki la buh ruh ia ka jingkyrpad ba ki bor sorkar kin iarap tynrong lem ia kane ka jingleit iakhun jong ki shabar ri, jngai na la ki kmie ki kpa bad jngai na la ka jylla bad ka ri baroh kawei.
