Shillong, Naiwieng 24: Ka Maitshaphrang Khasi League Cricket Tournament Committee mynta ka sngi ka la pynlait ia ka fixture na ka bynta ka jingialehkai cricket ba la pyniaid da ka Committee ha ryngkat ka jingiarap lang ka Meghalaya Cricket Association.
Ka jingiakhun kan sdang naduh ka 2 tarik u Nohprah 2021 ter ter. Haduh 32 tylli ki kynhun na Ri Khasi ki la wan ban ia shim bynta ha kane ka jingiakhun. 21 tylli ki dei na East Khasi Hills, 6 tylli na West Jaintia Hills, 1 na West Khasi Hills, 1 na South West Khasi Hills, 1 na Eastern West Khasi Hills.
Ka 1 East Jaintia Hills bad 1 na Ri Bhoi. Kane ka pyni shai ba ki samla Khasi ki thrang bad angnud palat ban ialeh kai cricket bad ban mihkhmat ruh ia ka jylla ki tournaments bapher bapher lada dei ha India ne wat shabar ri ruh
Ki kynhun ki ban ia shim bynta sngewbha shim ia ka fixture lyngba kane ka kyrwoh bad la kyrpad ruh ba kin bat ia ka sngi bad ka por kat kum ki kyndon ka Maitshaphrang Khasis Cricket League.
Ka KSU ka kitbok kitrwiang bad kan buh ha ki jingduwai ia ka kynhun ialehkai cricket jong ka Meghalaya ka ban ia khun sha ka Vijay Hazare Trophy ka ban sdang ha ka 3 tarik u Nohprah 2021 ha Jaipur.
Ka khubor sha ka cricket team ka Meghalaya ka long “la phi long lahduh ne phim long hynrei ha ngi phi la dei lypa ki lahduh” kane ka long katkum ka jingpynlait khubor u samla Reuben Najiar.
