New Delhi, Jymmang 28: U Myntri Rangbah duh ka ri u lah pynlong jingialang iamir jingmut halor ki kam jong ka Tnat Power bad ka Tnat jong ka New bad Renewable Energy jong ka Sorkar Pdeng, hynnin janmiet.
Lah iamir jingmut halor ki kam ba iadei bad ki sienjam katkum ki polisi ba kynthup ruh ia ka Tariff Polisi bad ka Electricity (Amendment) Bill 2020 khnang ban weng noh ia ki jingeh ba ia kynduh ha kaba dei bad ki kam pynmih bor ding.
U Myntri Rangbah duh ka ri u lah ban jur halor ka jing donkam ban kyntiew ia ka jinghun ki nongthied katba dang pynkhlain ia ka rukom trei bad ka jinglah kyrshan ki kam pynmih bor ding ha kaba iadei bad ka pisa.
U la ong ba ki jingeh ha ki kam pynmih bor ding, khamtam ha ki kam ba iadei bad ka jing pynpoi bor ding elektrik ki iapher na kawei ka jylla sha kawei. Ha ka jaka ban wad ia kawei ka rukom pynbeit ia kine, ka tnat ka dei ban wad ia ki lad ban ai jingmyntoi ia ki jylla haba ki lah ban trei kham bha.
U la ai jingmut ia ka tnat Power ban pynthikna ba ki DISCOM ki ai jingtip halor ka rukom trei jong ki na ka por sha ka por khnang ba ki briew kin tip ki DISCOM jong ki ki trei kumno haba nujor bad kiwei pat. U la ong ruh ba ki tiar ba donkam ha ki kam pynmih bor ding dei ban shna hi ha India.
Ha kaba iadei bad ka New & Renewable Energy, u Myntri Rangbah duh jong ka ri u la ong ba dei ban peit kyllum ia ka rukom sam jong ka sector kam rep naduh ki solar water pump haduh ki solar cold storage ba marwei marwei.
U la ban ruh halor ka jing donkam ia ki solar tnum da kaba bynrap ba u kwah ban iohi ba man ka Jylla ka dei ban don kawei ka sorbah (lada ka dei ka nongbah ne ka jaka jngoh kai pyrthei) kaba long pura ka nongbah solar lyngba ka rukom pynmih bor ding solar ha tnum.
U la ban jur ruh halor ka jing kyntiew ia ki kam ban shna ia ki ingot, ki wafer, ki cell bad ki module ha India ka ban plie lad ioh kam ruh ryngkat bad kiwei kiwei ki jing iohnong.
U Myntri Rangbah duh jong ka ri u kwah ruh ban pynkloi ia ka plan na ka bynta ka Ladakh kaba lait na ka jing pynmih karbon bad ka jing pynpoi um ha ki jaka rud duriaw da kaba pyndonkam da ka solar bad ka bor ding ba pynmih da ki kor lyer.
