Shillong, Risaw 28: Ka District Legal Service Authority ka East Khasi Hills District da ka jingiatreilang bad ka Meghalaya State Pollution Control Board (MSPCB) kila pynlong ia ka jinghikai ban sngewthuh ia ka ain bad ban pynpynsah ia ka mariang ha ka shnong Khohramhah kaba hap hapoh jong ka Sohra Civil Sub Division.
Ki nongkren ha kane ka sngi ka kong B Jyrwa kaba dei ka nongsait ain jong ka sorkar Meghalaya, kala kren ia ka jingpynneh pynsah ia ka um katkum ka ain Prevention and Control of Pollution Act, 1974, katba u bah S. Syiem ba dei engineer jong ka MSPCB u la kren ia ka bynta ka ban pynneh ia ki um ki kwah.
Kiwei kiba la kren ha kane ka jingialang ki long u bah Redly Thabah, PLV, Shillong, Smt P. Nongrum, Advocate, Shillong Bar Association bad u Bah Jerry Well War, rangbah shnong ka Laittyra village.
