Shillong, Naiwieng 09: Mynta ka sngi ka kynhun ki samla pule jong ka thian shatei lam mih ngi jong ka Ri India hapoh ka lama jong ka NESU kala pynlongia ka jingiakhih shong kyllain mungor ha baroh ki nongbah jong ki jylla ka thain shatei lam mih ngi ka Ri India namar ka jingbym shim khia ka sorkar pdeng ban wanrah ia ka jingsuk ha ka jylla Manipur.
Ka NESO ka shim ba ka jingbym lah ban wanrah ia ka jingsuk ha ka jylla Manipur ka dei namar ka bym shimkhia ne jingleh bym suit ñiew ka sorkar pdeng halor ka jingjia ïa um snam ha Manipur kaba la neh mynta 6 bnai tam, ha kaba bun ki mynsiem briew kila duh noh bad ki iing ki la pra la jot ha ka jingia ïa umsnam.
Ha Shillong ia ka jingiakhih shongkyllain mungor la lam khmat da ka KSU kaba dei kawei na ki dkhot jong ka NESO, ha nongbah Shillong ka jingiakhih shong kyllain mungor la pynlong ha khmat u mot ba shi rynïeng u Tirot Sing Syiem uba don ha Laitumkhrah kaba palat spah ngut kila ia shim bynta.
Ïa kane ka jingiakhih kaba la pynlong kum ka dak ban pynrem jur ia ka jingbym lah ka Sorkar Pdeng ban leh eiei ha ka ban pynkut noh ia ki kam ia umsnam kaba la jia ha Manipur, kane ka jingiakhih ka NESO ka long ruh ban pynpaw ia ka jingsngewkhia halor ka jinglong jingman ha ka Jylla Manipur.
Ki nongiashim bynta kiba kynthup ia ki nongialam bad ki dkhot jong ka KSU, JSU, GSU, FKJGP, HNYF, RBYF, HITO, Shillong Manipuri Students’ Union, Kuki Students’ Organisation Shillong, Naga Students’ Union Shillong, Shillong Socio-Cultural Assamese Students’ Association,Mizo Students’ Union Shillong, Twipra Students’ Federation Shillong, Arunachal Students Union Shillong, Mara Students’ Organisation bad Lai Students’ Association.