Shillong, Nailur 16: Ka National Academy of Broadcasting and Multimedia (NABM) kaba dei ka apex Human Resource Development Training Academy jong ka Prasar Bharati, ha ryngkat ka jingiatreilang bad ka Regional Academy of Broadcasting and Multimedia (RABM), Shillong, ka la pynlong ia ka prokram ai jinghikai kaba ar sngi kaba la ai kyrteng “Empowering Presenters: On-Air Excellence in Akashvani” ha ka 14 bad 15 tarik Nailur ha nongbah Shillong.
Baroh ki don 30 ngut ki nongtrei casual kiba dang shu pynrung thymmai na Akashvani Shillong, ka North Eastern Service and Community Radio Station (CRS), Nongstoin, kiba la iashim bynta ha katei ka prokram, kaba la thmu ban kyntiew ia ka sap treikam jong ki bad ban pynkhlain shuh shuh ia ka jingbha jong ka rukom pynbna da ki radio.
Ïa kane ka prokram la sdang ha ka 14 tarik Nailur da ka jingplie pyrda ia ka da u Rehan Ahmad Warsi, Additional Director General (Training), Prasar Bharati, ha ka jingïadon lang u Course Director Dr. D. K. Mazumder, Programme Executive, NABM, New Delhi.
Ha ka jingialang plie pyrda la iadon lang u Bah Anthony War, HOO/Cluster Head, Akashvani Shillong; Ka B. Zoramthangi, Head of Programme, Akashvani Shillong; u S. Chongloi, North Eastern Service; ka kong Lucy Mary Malngiang, Programme Executive, RABM Shillong; bad ka Grace Temsen, Assistant Engineer, Akashvani Shillong.
Kane ka prokram ai jinghikai ka kynthup ia ki bynta ba kongsan jong ka jingtbit ha ka jingpynbna lyngba ka radio, kynthup ia ka bynta bad jingkitkhlieh jong u nongpynbna, ka rukom kren, ka jingkynnoh ktien, ka jingpynbeit ia ka ktien, ki buit pyndonkam ia ka maikrofon, ka rukom ring sur, ka jingring mynsiem bad ka koit ka khiah jong ka sur.
Ki jingïalang ki la pynleit jingmut ruh halor ka jingïadei bad ki nongsngap, ki buit ktien na ka bynta ka jingïakren kaba thikna, ka kam ha ka studio, ka jingpynpaw bad ka jingpynsawa ha ki prokram phareng bad ki jingrwai jong ki ri Sepngi.
Ki nongiashim bynta ki la ioh ruh ia ki jinghikai ba iadei bad ka jingpynlong ia ki prokram radio, ka prokram ba pynlong syndet bad ka jingai jingmut jong ki riew shemphang ban pynkhlain ia ka jingsngew skhem bad ka jingtbit jong ki ban pyniaid ia ki prokram.
Ha kane ka prokram la don ka kynhun jong ki briew kiba la tbit bha, kynthup ia ka Kong Basilica Nongpluh, Senior Announcer, Akashvani Shillong; Prof. M. P. Pandey, Department of Hindi, NEHU, Shillong Campus; Bah Arkin Pariat, ADP ba la shongthait, Akashvani Shillong; Prof. T. K. Bamon, Dean, School of Liberal Studies, MIT University of Meghalaya; Kong Kloisimon Kharsyntiew, Senior Announcer, Akashvani Shillong; bad u Dipankar Nandi, General Secretary, Meghalaya Yoga Association, Shillong.
Kane ka sienjam ka pynskhem ïa ka jingangnud jong ka Prasar Bharati ban kyntiew ïa ka jingtbit jong ki nongtrei ha ka kam jingpynbna bad ban kyntiew ïa ka kam radio kaba shai, kaba lah ban shaniah bad kaba pynsngewtynnat ïa ki nongsngap ha kylleng ka jylla Meghalaya bad ka thaiñ Shatei Lammihngi.
