Shillong, Jymmang 22: u Chief Executive member jong ka KHADC u bah Titosstarwell Chyne u pynpaw ka sngewsih iaka jingkhlad noh jong ki arngut ki riewrangbah kiba la noh synniang shi kat dei eh iaka Jaidbynriew jong ngi lyngba ka rwai ka siaw u bah Rana Kharkongor bad u bah R Waroh Pde.
Ka jingkhlad noh jong kine ki riewrangbah ka da long shisha ka jingduh kaba khraw haduh katta katta ym tang iaka iing ka sem hynrei wat iaka Jaidbynriew ritpaid ka jong ngi ruh.
Ka jingrwai jong ki ka da long shisha kaba sngew thiang ban sngap bad kiba kit jingmut haduh katta katta, ki don ruh ki jingrwai kiba kren shaphang ka Ri bad ka Jaidbynriew, ki jingrwai kiba kren shaphang ka jingiadei parabriew, ki don ruh jingrwai kiba don ki kyntien sneng ki kyntien kraw.
U CEM jong ka KHADC u la ong ba la niar ban shem kine ki jaid jingrwai ha kum kane ka juk bad ka pateng kaba mynta. Nga sngew ruh ban ong iar ban don ki ban mih pli ha ka jaka ka jong ki.
Kumta nga phah ruh iaka jingsngewlem iaka iing ka sem jong kine ki riewrangbah wat la ngam iohlad ban iadon ryngkat bad ki ha kum kane ka por, hynrei nga buh ruh ha ki jingduwai ba U Blei Trai Kynrad un pyntngen bad pynshaitbor iaka jingmynsiem kaba la mong bad lwet ka jong ki.
To U Blei ka jingsuk un don ryngkat bad ki ha kum kane ka por ba ki mad ia U Lyoh ba dum ha ka longiing longsem ka jong ki. To ai ba ka mynsiem jong ki kan ioh iaka jingjahthait bymjukut, la ong u CEM ka KHADC u bah Titosstarwell Chyne.
