Shillong, Jylliew 23: Ka KSU EJHDU ha ka 21 tarik mynta bnai Jylliew 2024 ka la ioh ban ia kynduh ia u Bah G. Warjri ADC EJHD namar ka jingbymdon u DC. Ka seng ka la buh ka jingujor halor halor kato ka jingjia ha shnong Kuliang kaba la jia ha ka 19 tarik mynta bnai Jylliew 2024.
Kaba ki BSF ki la rung jubor ha kato ka ïng shiteng synñia. Ha ka jingthoh ka seng ka la dawa ban pynshitom katkum ka aiñ ia kito ki BSF ban leh da kaba tyngeh. Hadien ba la mih na kamra u ADC ka seng ka la ioh ban leit jngoh sngewlem ia u rangbah ba shah shoh ha ki BSF uba thiah pang ha Civil Hospital Khliehriat uba la mynsaw jur na ki jingorpait ki syieng krung .
Ka KSU EJHDU ka la pynrem jur ia ki BSF kiba leh donbor ia ki paidbah ka Shnong Kuliang ha ka por mynmiet da kaba shoh bad bom ia ki kynthei khynnah ki rangbah khlem map shuh, kane ka jia na ka por sha ka por.
Kane ka jingleh donbor kine ki BSF kam dei shuh ka sien ba nyngkong hynrei la bunsien. Ki paid nongshong Shnong ka Sonapyrdi, Huroi Umkiang ki la ujor bunsien sha kiba dei khmih naduh ki SP ka District DC, hynrei kine ki khlem leh eiei ka shu kut khlem seisoh.
Kane ka la pynlong ia ka Seng ba la lam khmat da u General Secretary ka Seng KS Suchiang, Asst GS Pynshai Kupar Dkhar ban leit ujor sha ka DGP ka jylla ban leh eiei ban pynkynriah ia kine ki BSF kiba ha Sonapyrdi bad kito Kiba don ha NH-6 ha khappud jong ka shnong Dona Umbluh bad Ratachera.
Namar ka jingdon jong ki ha kito ki jaka kim lah satia ban teh lakam ia ka jingwan rung tuh ki khar Bangladeshi sha ka jylla. Kum ban pynkynmaw ka seng ka la dep ia kren bad u Deputy CM ka jylla ba dei peit ia ka Tnad Kam Poh Iing hynrei ka khlem poi shaei shaei ruh ka kut tang ka kular.
Ka seng ka nang iai buddien ia kane ka jingleh donbor ki shipai bharat ia ki paidbah. Ka seng ka khmih lynti ba ka DGP kan leh ia ka ba dei tam.Lada kam urlong ka jingdawa pynkynriah ia kine ki BSF na kitei ki jaka, ka seng kan sa pyrkhat da kawei ka sien jam.
Ka seng ha kane ka sngi ruh ka la leit ban jngoh ia u Rangbah ba shah thombor ha ki BSF ha Khliehriat Civil Hospital.
