Shillong, Nailur 04: Central Executive Council ka pynrem jur ia ka jingleh jong uwei u pulit uba phong jain iong uba kah dur ialade, uba lah bret da u Stun Grenade ha kawei na ki dukan jong ka Longkmie Khasi.
Katkum ka jingiohi lyngba ki video ba lah saphriang kaba pyni ba une u Pulit u lah kawang ia u Stun grenade (tear gas) hapoh kane ka dukan kaba don ha Parking Lot mar pyrshah jong ka SBI Main Brnach mynne ka sngi.
Kane ka jingleh jong une u pulit I kumba u don jingthmu ban shim ia ka jingim jong kiba don hapoh jong kane ka dukan kiba kynthup ia ki Trai dukan bad ia ki Nongwan bam.
Shu donbok ba ha kane ka dukan kim shym lah pyndonkam ia ki tyndong shet (LPG Cylinder) hynrei te ka lah jia kaei kaei kaba sngewsih wat ban poi sha ka jingiap ruh ia kiba don hapoh kane ka dukan.
Na ka liang ka Seng ngi dawa ba dei ban pynshitom ia une u Pulit bad ia ki ophisar ki bym shym la lah ban the lakam ia ki pulit lajong. Ha ka jingshisihsa haba pyndonkam ia ki tear gas dei ban da antad tang ban pynpra ia ki paidbah ym ban leit kawang sha ki dukan sha jong ki riew shimet.
Ka Sorkar kadei ban pynlong da ka jingtohkit kaba laitluid la utei u pulit u bret ia utei u bom da ladae hi lane la don ki ophisar kiba aibor ia u ba un leh ia katei ka kam beain.
Ki dawa ruh ba ki bor pulit bad ki bor synshar district kidei ban pynshai naei ki ioh ia ka bor ba kin leit kawang ia kum kine ki tiar pynbthei hapoh ki dukan jong ki riew paidbah ki bym don bynta ei ei bad ka jingjia ia kulmar. Ka Sorkar kadei ban leit siew bai lutksan mardor ia ki trai dukan bad kumjuh ruh kadei ban ai bai dawai ia kiba mynsaw ha katei ka dukan.
Ka Khasi Students’ Union, Mawlai Circle hadien ba ka lah ioh jingtip, ba ka jingiakynnad hapdeng ki dkhot kawei ka seng bhalang bad ki pulit hapoh ki thaiñ Khyndailad ka ba lah sakhi iaka jingpynibor jong ki Pulit.
Hakane ka jing pyni bor ki pulit, ka lah don ka jingleh palat jong ki bor pulit ha kaba ki lah thombor khlem kheiñ snep shuh iaki kynthei briew ki ba die dukan hapoh ka jaka pynieng kali jong ka MUDA ha pyrshah ka SBI ophis hajan Khyndailad.
Kane ka jingthombor ki pulit da kaba kawang ia u Bom pynsat khmat hapoh ka dukan die sha wat hapdeng ba kitei ki longkmie ki lah khang khyrdep iaka dukan ka jong ki. Kane ka jingleh jong u wei u pulit phong jaiñ iong kaba lah iohi bad ba la saphriang lyngba ki kor ring dur(Video).
Kane ka jingleh ka dei ka jingthmu ban pynpynsaw ia kitei ki 2 ngut ki kynthei briew ki ba dei napoh ka shnong Mawlai Mawtawar, Umjalimut kane ka jingleh utei u pulit ka dei ym tang ka jingleh kput lane leh rhah hynrei ka dei ka jingthmu wat ban shim iaka jingim ka jongkitei ki kynthei briew ki bym don bynta eiei haka jingklumar kaba mih ha ki thaiñ Khyndailad mynne ka sngi.
Ka Seng ka pynrem jur iakane ka jing thombor ki pulit ki bym shym lah don ka mynsiem jingisynei shuh wat iaki kynthei briew, ka Seng ruh ka dawa ba ki bor bahalor ki dei ban pynshitom mardor iaki pulit ki ba donkti hakatei ka jingthombor.
Shuh shuh ka seng ka i kyndit iaka jingleh khlaiñ bor ki pulit iala ki doh ki snam hapoh sor Shillong hynrei katba ki pynrit bad pyndem tdong pat ha ki thaiñ khappud.
