Shillong, Nohprah 13: Ka KSU South West Khasi Hills District ka pynrem jur iaka jingkren laplah bad ka jingkren khlem pyrkhat jong u Bah Rowell Lyngdoh Symbut Myntri Rangbah barim halor ka Inner Line Permit kumba ka la paw lyngba ki lad pathai khubor ha kine ki sngi ba lah leit.
Ka seng ka sngew ban kynthoh ruh ba kum kine ki jingkren ki dei ki jingkren pyrshah Jaitbynriew bad ki jingkren kiba pynjem daw bad ktah mationg iaka Jaitbynriew kaba dang ap kmang mynta ban ioh iaki ain kiba khlain kum ka ILP ban iada iaka Ri bad ka Jaitbynriew naka jingwan rung beain khlem ki kot ki sla kiba biang haka jylla jongngi.
Shuh shuh ka seng ka sngewdei ban kynthoh ba imat dei ba don Kum kine sa ym ioh ILP, bad mano ban tip ioh lehse haka sorkar mynta ruh ki don kum u tei ba pyrshah ILP kiba sylla napoh khnang ba ka sorkar pdeng (NDA ) kan nym ai ILP hangne haka jylla jongngi.
Ka jingong jong u Bah Rowell ba ka ILP ka dei kata ka jingbishni briew ka pyni iaka jinglyngkot jingmut jong u kum u riew rangbah bad u riew sain pyrthei . Ha ka jingshisha ka dei ka hok jong ki ritpaid bad ki riew lum ban ioh iaka jingiada katba kum ka Riti synshar paitbah ( Constitution) jongka Ri India.
Wat ka pyrthei ruh ka ithuh ba ki ritpaid ne ki riewlum ki donkam ban ioh iaki ain ban iada iaki kumba la pruid dak ha ka United Nations Declaration on the Rights of the Indigenous People. Lada ngin phai sha ka Art. 19(5) jongka Ri India ruh ngin lap ba ka Constitution jongka Ri Inda kam shym la Khang ban pyntreikam iaki ain ba la don lypa ne ban shna iaki ain pyrkhing iaka rung ka mih ne haba iadei bad ban wan shong wan sah jong ki bym dei riewlum haki jaka jong ki riew lum( Scheduled Tribe).
Kane ka pyni ba u Bah Rowell u shu kren lamwir bad kren khunlung khynnah . Ka jingong jong u ba ka ILP ka long kumba ia bishni briew ka pyni iaka jinglong bishni jong u hi ym jong ki paitbah ba dawa ILP namar kane ka ain ka dei katba kum ka Riti Synshar paitbah bad ka dei ruh ka ain kaba la pyntreikam ha kiba bun ki jylla jongka thain shatei mihngi jongka Ri India ( North East).
Ki paitbah ki dawa iaka ILP mynta da ki phew snem bad Kim shym la dawa ban bishni iano iano hynrei ban iada ialade bad iaka Jaitbynriew naki briew ba na bar ban wan rung khlem ki kot ki sla kiba biang ne ban ioh long trai shnong ha Ri jongngi bad ngi dawa ia ka ain kaba la ithuh daka Constitution jongka Ri India ym dei ba ngi dawa ban ai Sovereign State iangi ne ban ai la ka jong ka lama bad ka Constitution.
Mynta ka la paw shai ba ka jingdon ia ki nongmihkhmat kum u Bah Rowell Lyngdoh haki por ba la leit ka la long shisha ka jingkhanglad iaka Jaitbynriew ban ioh iaki ain ban iada kum ka ILP. Kyntang iawai , ka seng ka kwah ban buh jingkylli iaka NPP Mawkyrwat Constituency bad NPP South West Khasi Hills District , Aiu ki don ban ong halor kane ka jingkren jong u Bah Rowell. Hato kin pyrshah ILP lang kumba la kren da ma u, Kane ka dei ka kyrwoh na u samla Forwardman Nongrem , President, KSU South West Khasi Hills District.
