Shillong, Naiwieng 5: Ka Seng Khasi Kmie, Shillong, kam lah ban khlem da pynrem jur ia ki briew ba la don kti ha kaban leit ban pynjulor ia u lum jingtep ba dei jong ka Seng Khasi Mawlaingut.
Haba iadei bad kane, ka Seng Khasi Kmie, ka kyntu ia ki bor ba dei khmih jong ka distrik, ban shim khia ha kaban kem mardor ia ki briew ba donkti, ha kaban leit ban pynjulor ia kane ka jaka.
“Ngi kyntu ia ki pulit bad ia ki bor ba dei khmih jong ka distrik kidei ba kin shim khia ia kane ka jingjia, namar lada kheiñ sting, ka lah ba kan wanrah ia ka mynsiem sngew iapher niam bad ruh jingiapher jingmut ha ki shnong ki thaw” la pynpaw ka kyrwoh na ka Seng Khasi Kmie.
Kumban shu pynkynmmaw ba ha ka 20 tarik u bnai Risaw ba la dep, ki briew bym lah ban tip ki la leit ban pynjulor da kaba pom naphang ia ki dieng ki siej ba la mih ha kane ka jaka.
Hadien kane ka jingjia, ki nongialam ka Seng Khasi Mawlaingut, ha ka 3 tarik, kata ha kane ka sngi Hatmajai jong ka taiew, ki la wan ban ujor da ka ejahar (FIR), ha Lumdiengjri PS, da kaba kyntu ruh syndon bynta ban kem ia ki briew ba donkti ha kane ka kam.
Kane ka jaka ka dei jong kong Prem Nongbsap bad ba I la die noh sha ka Seng Khasi Mawlaingut ha ka 20 tarik u bnai Nohprah 2017.
