Shillong, Naitung 14: Kum ka dak jong ka jingkynmaw burom ia ka jingdap lai snem jong ka jingkhlad noh u nongseng ia ka O M Roy Memorial Higher Secondary School ka ba don ha Mawlai Kyntonmasar kata u bah TL Pariong ki bor pyniaid jongkane ka School ha ka 9 tarik u Naitung 2024 ki la ioh ban plie ia u mot dur sah kynmaw jong u ha phyllaw jongkane ka School.
Ia kane ka sngi leh kynmawburom la wan ban ia don lang na duh u MLA ka Mawlai U bah Brightstarwell Marbaniang, u MDC u bah Teibor Pathaw, ka Principal jong kane ka School, ki ba ha iing jong u (L) TL Pariong, ki Nonghikai bad kumjuhruh ki khynnah school.
Ha ba ai jingkren na ka liang ka khun jong utei u Rangbah ka kong Astronomist Syiemlieh ka ba dei ruh ka Orincipal jong kane ka School ka la pynsngew ia ka jingiaid lynti jong u kpa jongka bad ki kam ki ba une u Rangbah u la nohsynniang sha ka imlang ka sahlang.
Kala iathuh ba u Kpa jong ka u bah TL Pariong hashwa ba unseng ia ka OM Roy Memorial School ha u snem 1992 u la ioh ban seng shwa ia ka O B Roy Memorial Lp & Up School ka ba don ha Rangthong, Mawkyrwat ha u snem 1973.
Ha ka jingshakri jong u (L) T L Pariong kum u nonghikai, Headmaster bad Secretary jong ka Rangthong Christian School u la ai ka jingshakri ka ba la 51 tylli ki snem eiei ha ka kam ha ka ba ka sorkar ka la sngew dei ban ai ka jingithuh ba kyrpang ha ka ba u la ioh ia ki Awards ha u snem 1981 na ka District jong ka East bad West Khasi Hills District, ha u snem 1985 na ka State Aword Meghalaya bad ha u snem 1987 na ka National Awards New Delhi.
Ka khun jong u ka la pynkynmaw ruh ia ka jingai jingkyrshan bad ai mynsiem ia ki khynnah pule ha kane ka school kham tam ha ka liang ka kam ialeh kai sport ha ka ba kane ka school ka la ioh ban mih khmat ia ka Jylla ha ka National Subroto Mukharjee Cup 2013 bad ka la long ruh ka lah duh ha katei ka snem.
Ha kane ka sngi pynsah jingkynmaw ia ka lynkhuh sngi iap jong u (L) T L Pariong la ioh ia ka jingrwai na ki khynnah jong kane ka school, la ioh ia ka jingkren na ki ba haiing, ka jingjren na u MLA ka Mawlai, MDC ka Mawlai bad kiwei kiwei pat ki riew paw khmat.
