Shillong, Jylliew 15: Ha dien ka jingpakhang surok kaba la iaid saw sngi lynter hapoh jong ka shnong Mawtap-Pyllun mynta ka sngi, ka ophis jong ka u Executive Engineer PWD (Road) National Highway Division kala phah ia u overseer ban ia kynduh ia ki paidbah jong ka shnong Mawtap Pyllun ha kaba ia dei bad ka jingpakhang surok.
U bah A War sordar jong ka shnong Mawtap Pyllun u la iathuh ba mynta ka sngi na ka liang jong ka PWD kala phah ia u Bah Majaw u ba dei u overseer ban ia kynduh ia ki paidbah jong ka shnong bad ha kane ka jingiakynduh u la pynshai sha ki paidbah ba ka PWD kam don kot don sla ha kaba ia dei bad ka surok kaba la khang ban shna ia ka lynti iaid kjat.
U Sordar jong ka shnong Mawtap Pyllun u la pynpaw ia ka sngew lyngngoh ban ong ba ka ophis kam don kot don sla kane ka long kaba ym lah ban ngeit da lei lei ruh na ka liang jong ka shnong ba ong ba ka PWD kam don kot don sla, ka jingkylli kaba ki paidbah ki kylli ka long kaei ka jingmut pat ban don ia ki maw ba la thung da ka PWD.
U Bah War sordar jong ka shnong Mawtap Pyllun u la kyntu ia u Deputy Commissioner jong ka East Khasi Hills ba un wan ban jngoh hi da lade ia kane ka jaka ban sngewthuh ba haduh katno ki paidbah jong ka shnong ki don kam ia ka lynti iaid kjat ban snghian ka leit ka wan jong ki paidbah nongshong shnong.
Ki paidbah jong ka shnong Mawtap Pyllun kid a thrang ban don ia ka lynti iaid kjat namar ka jaka kaba la shah pynsngeh mynta ban shna ia ka lynti iaid kjat ka long kaba don ha ka jingma ia ki nongleit nongwan dei na kane ka daw ba ka shnong kala shimkhia ia kane ka kam ban shna ia ka lynti iaid kjat.
