Shillong, Jymmang 21: U Myntri Rangbah ka jylla u Cornad K Sangma haba pynshai ia ka jingjubab u myntri ka koit ka khiah halor ka jingkylli bynrap ha kaba ia dei bad kor incinerator, u la pynshai hapoh ka iing dorbar ba ka Civil Hospital Shillong kam don ia kane ka kor thang niut haduh mynta.
Haba jubab ia ka jingkylli jong u bah PT Sawkmie MLA ka Mawlai haba ia dei bad ka jingiada ia ki nongtrei ban ialeh pyrshah ia ka khlam COVID-19, u Bah AL Hek myntri ka koit ka khiah u la iathuh hapoh ka iing dorbar ba ka sorkar kala shim ia shibun ki lat ki lynti ban iada ia ki da kaba ai ia ki PPEs da kaba but ryntih ia ki kyndon kiba la bthah da ka sorkar pdeng.
Haba jubab ia ka jingkylli jong u Bah SK Sunn haba ia dei bad ki kor Incinerator ban thang ia ki jaboh kiba mih na ki hospital, u Mytnri ka koit ka khiah u la ong ba ka don katei ka kor hapoh jong ka Civil Hospital Shillong.ka sorkar ka pdeng pynkhreh ruh ban buh ha Jowai bad Tura Civil Hospital ia kane ka kor thang ia ki jaboh ba mih na ki Hospital.
U myntri ba dei peit ia ka tnad Social Welfare u Bah Kyrmen Shylla haba jubab ia ka jingkylli Bah George B Lyngdoh MLA ka Umroi u la iathuh ba hapoh ka jylla Meghalaya baroh ki shnong kiba ym pat don ia ki ICDS ki long haduh 292 tylli.
Na ka liang jong u myntri u la iathuh ba kane ka dei ka skhim jong ka sorkar pdeng bad ka sorkar jylla kala dep pan sangtion na ka sorkar pdeng hynrei haduh mynta ym pat na ka liang jong ka sorkar jylla ka dang ap ia ka sangtion na ka sorkar pdeng.
La iathuh ba da ka jingbym don ia kine ki ICDS kala wanrah ia ka jingduh nong ia ki 10,500 ngut ki briew jong kane ka jylla kiba dei ki khylling khynnah.
Haba jubab ia ki jingkylli bynrap u myntri u la iathuh ba ka sorkar jylla kala thoh sha ka sorkar pdeng naduh ka 14th Jylliew 2019 bad ha ka 20th Rymphang 2020 ka sorkar kala thohbiang ban pynkynmaw ia kane ka kam ICDS bad ha ka 9th Lber 2020 la thoh hynrei pat ioh sangtion haduh mynta.
Ha kawei pat ka jingylli kaba la wanrah da u Bah HM Shangpliang MLA jong ka Mawsynram, ha kaba ia dei bad ki Pukri Um ha khappud bang ka Bangladesh hapoh ka Mawsynram Konstitwensi, haba jubab ia kane u myntri Rangbah ka jylla u Conrad K Sangma u la iathuh ba ka sorkar kala pdiang ia kane ka skhim bad na ka liang jong ka Planning kala dep ban pynlait bad mynta kan leit sha ka tnad pla pisa bad kane ka skhim ka long tang kumba shiklur.
Halor ka jingkylli jong u Bah SK Sunn haba ia dei bad ki jaka ba don ha pdeng ka jingiakjaia pud bad ka jylla Assam u Myntri Rangbah u Conrad K Sangma haba jubab ia kane u la ong ba ki jaka ba don ha pdeng ka jingiakajia ki don 12 tylli bad ka khappud kaba ia dei bad ka jylla Assam ka long haduh 884.24 Km.
