Shillong, Jylliew 29: Ka seng Khun Hyniewtrep National Awakening Movement(KHNAM) State Youth wing mynta ka sngi ka 28 tarik u Jylliew 2024 ka la pynskhem ïa ki nongkitkam jong ka State Youth Wing ha ka jingïalang ba la pynlong ha Khasi National Dorbar Hall.
Ïa kane KHNAM State Youth Wing la pynskem da ka jingpule ïa ka tien kular ka seng da u President ka KHNAM seng kmie u bah Pyndap Saibon ha ka jingdon ryngkat u Working President u Bah Thomas Passah lem ki nong ïalam ba ha khmat jong ka party.
La pynskhem ïa u samla Ericton Donbok Swer kum u President, arngut ki Working President u samla Joseph Pyngrope bad u bah Pynshai Mawrie, u samla Wanbhabok Marweiñ kum u General Secretary.
Haba ai jingkren ha ka jingialang u President rangbah ka KHNAM u la ong ba ha ka jinglong nongïalam kin bun ki jingpynthame jingshah pynbiej ba na ka diang ka mon hynrei kum ki samla ba la rai skhem ban bah ïa ka lyngkor kum ki nongïalam ka jaitbyndriew.
U la ongruh ban long kum ki nongïalam ha ka juk mynta, hap ban mat shibun ki jing shah beiñ shah kynthoh ha ki liang ba pher ba pher khamtam ha kane ka juk jong ka social media.
U Working President ka KHNAM u bah Thomas Passah haba ai jingkren ha kane ka jingïalang ha u la pynpaw ba ka seng KHNAM kam dei eh ka party ban jop tang ka election ban ioh pisa, ka don la ka nongrim ka ba dei ban trei kum ka Awakening Movement.
U la ongruh ba ka KHNAM kan ïakhun tyngeh ha kane ka election MDC ban sa wan, lada ka KHNAM kan ioh leh ïa ka bor synshar ha district council, ngan pynthikna ba hadien shisnem phin sa ïohi ïa ka district council.
